Քո անունը քո մասին գրված ու չգրված ամենակատարյալ բանաստեղծությունն է՝ Երեվան Կարինե Աշուղյան

Ուրիշ կյանք

Մի ուրիշ կյանքում երեւի
Մեր հոգու-մարմնի քնքշանքից
Տիեզերքն` ավելի խորախոր,
Լուսառատ կդառնար ավելի,
Կծաղկեր ցնծությամբ աստղաշող։
Մի ուրիշ կյանքում երեւի
Մեր հոգու-մարմնի քնքշանքից
Երկիրը կպարեր սիրահեղ,
Կդառնար դրախտի վառ պարտեզ։
Մի ուրիշ կյանքում երեւի
Գտնեինք իրար այնքան վաղ`
Առաջին սիրարբուն հայացքից,
Առաջին համբույրից սկսած,
Որ հետո ձոնեինք մեկմեկու
Մեր ամեն վայրկյանը ու կյանքը։
Իսկ հիմա, իմ գտած-չգտած,
Ունեցած-չունեցած սիրելի,
Դու` հոգի ու մարմին իմ կիսյալ,
Գիշերվա երազում վայելիր
Մեր կյանքը, որ կգա երեւի։

Կարինե Աշուղյան