Կառավարության շենքի դիմաց առավոտից բողոքի ակցիա են իրականացնում ՌԴ մեկնելու ցանկություն ունեցող քաղաքացիները։ Նրանք պահանջում են կառավարությունից հստակ լուծումներ առաջարկել և բացել սահմանները։ Ակցիայի մասնակիցներից շատերը նշում են, որ արդեն մի քանի ամիս արտակարգ դրության պատճառով չեն կարողանում վերադառնալ Ռուսաստան՝ իրենց ընտանիքների մոտ։
Ցուցարարների հետ հանդիպեց ԱԳ նախարար Զոհրաբ Մնացականյանը։ Նախարարը հավաքվածների հետ զրույցում ասաց․«Հայաստանի քաղաքականությունն այնպիսին է, որ յուրաքանչյուր ՀՀ քաղաքացի, ով ուզում է, առանց խոչընդոտների կարող է վերադառնալ Հայաստան։ Ինչ վերաբերում է Հայաստանից դուրս գնացողներին, վերջինները պետք է հաշվի առնեն՝ ինչպիսինն է այդ երկրի քաղաքականությունն այլ երկրների քաղաքացիներին ընդունելու մասով։ Օրինակ մենք չենք ընդունում այլ քաղաքացիների։ Հիմա ավելի հեշտացրել ենք, բայց մենք էլ ենք մեր քաղաքականությունն ունեցել, որովհետև համավարակ է»։
Մասնակիցներին մոտեցավ նաև վարչապետի օգնական Նաիրի Սարգսյանը, նա խոստացավ առաջիկա մեկ ժամվա ընթացքում վերջնական պարզաբանումներ ներկայացնել իրավիճակի հետ կապված։
Բողոքի ակցիա իրականացնողները պարզաբանում են, որ արդեն 5 ամիս հույսով սպասում են, որ լուծումներ կառաջարկվեն կառավարության կողմից։ Ոմանք հայտնում են՝ տոմսարկղերում տարօրինակ երևույթներ են կատարվում՝ հայտարարում են տոմսեր կան, բայց ցանկացողները չեն հասցնում գնել։ Դիմել են նաև Ռուսաստանի դեսպանատուն, այնտեղից հայտնել են, որ սպասում են արտակարգ դրության ավարտին։
Քրիստինե Հովսեփյան
