ԱԺ «Իմ քայլը» խմբակցության պատգամավոր Գևորգ Պապոյանն անդրադարձել է նախարար Արայիկ Հարությունյանի և իմքայլական պատգամավորների երեկ կայացած հանդիպմանը։
«Մամուլում «տեղեկություն» է հայտնվել պատգամավորների և նախարար Արայիկ Հարությունյանի երեկվա հանդիպման մանրամասների մասին։ Որպես հանդիպման մասնակից փաստում եմ, որ նյութում զետեղված մի շարք «մանրամասներ» գրեթե ամբողջությամբ մտացածին են, միգուցե ցանկալին իրականության տեղ մատուցելուն միտված»,- գրել է պատգամավորը Facebook-յան իր էջում։
Նշենք, որ «Ժողովուրդ» օրաթերթը «մանրամասներ» է հրապարակել նախարարի և «Իմ քայլը» խմբակցության երեկ կայացած հանդիպումից։ Թերթի տեղեկություններով՝ հանդիպման ժամանակ Արայիկ Հարությունյանը գրեթե չի խոսել, պատգամավորների հնչեցրած հարցերին հիմնականում պատասխանել է փոխնախարար Ժաննա Անդրեասյանը։ Հանդիպմանը քննարկվել են դպրոցներում Եկեղեցու պատմություն առարկան դասավանդելու, կրթության չափորոշիչների, դպրոցներում խորհուրդներ ստեղծելու հարցերը։ «Արայիկ Հարությունյանը, կարելի է ասել, գրեթե բոլոր հարցերի ժամանակ նայել է փոխնախարարի դեմքին, որպեսզի նա պատասխանի հարցերին»,- գրել է «Ժողովուրդը»՝ հավելելով, որ հանդիպումից հետո «իշխանական ֆրակցիայում ավելի է խորացել դժգոհությունը նախարարի դեմ»։
Հ.գ. հուսանք, որ Գևորգ Պապոյանը «մտացածին մանրամասները» հերքելուց բացի, մի քանի «ճշգրտող» հարց էլ ուղղել է իմքայլական գործընկերոջը՝ Թագուհի Թովմասյանին…
Քրիստինե Հովսեփյան
