«Սասնա ծռեր» զինված խմբի 10 անդամի պատժաչափերի հրապարակումից հետո «Սասնա ծռերը» և նրանց համակիրները արշավ են սկսել վարչապետ Նիկոլ Փաշինյանի դեմ։ Մեղադրանքներ են տեղում վարչապետի հասցեին, որ, իրենց կարծիքով, կեղծ արտաքին չեզոքություն է ցուցաբերում և շարունակում «նախկին հանցագործ ռեժիմի» քաղաքականությունը։ Բոլոր «մեղադրականներում» կարմիր թելի պես անցնում է այն գիծը, որ հենց Փաշինյանն է ցանկանում ճաղերից այն կողմ տեսնել խմբի անդամներին։
«Նիկոլ Փաշինյանը կիսագաղութային ադմինիստրացիայի ղեկավար է, մնացել է կրեմլակենտրոն, կիսագաղութային համակարգ։ Դա դավաճանի պաշտոն է, ՀՀ վարչապետի պաշտոնը դավաճանի պաշտոն է, եթե համակարգային փոփոխություններ չի կատարվում»,- ArmDaily.am-ին ասել է Վարուժան Ավետիսյանը։
Գարեգին Չուգազյանն էլ նշել է, որ ծռերի ապստամբությունը կասեցրել է լավրովյան պլանի վտանգը. «Այս ողջ ապստամբական գործողությունը եղել է ծայրեծայր քաղաքական, և գալիք սերունդները պետք է հպարտանան, որ գտնվեցին անձնական զոհաբերության պատրաստ հայորդիներ, որոնք փրկեցին մեր արժանապատվությունը և հայրենիքի մի մասի վերահաս վաճառքը։ Եվ եթե այս իշխանությունը փորձում է կոծկել այս ամենը, ապա սա վկայում է այն մասին, որ իրենք նպատակ են հետապնդում սքողել գործողության բուն էությունը, իրավաքաղաքական գնահատական չտալով՝ փրկել նախորդներին պետությունը զավթելու և պետական մասշտաբի հանցագործությունների հատուցումից»։
Ակնհայտ է՝ ծռերի անդամները չեն ցանկանում վերադառնալ կալանավայր և փորձում են մանիպուլյատիվ հայտարարություններով հասարակական հուզումներ առաջացնել և ճնշումներ գործադրել Նիկոլ Փաշինյանի վրա։ Բայց արդյո՞ք վարչապետը պետք է տրվի հասարակության մի մասի ճնշումներին՝ անտեսելով կոնֆլիկտի երրորդ կողմին։
Հանուն արդարության պետք է հիշեցնել, որ ապստամբության արդյունքում զոհվել են 3 երիտասարդ ոստիկաններ, որոնց մասին փորձում են չխոսել ծռերն ու իրենց համակիրները, բայց նրանց ընտանիքները պատրաստ չեն ընկալելու ծռերի «հայրենասիրությունն» ու ապստամբությունը և պահանջում են արժանի դատավճիռ։
Քիչ չեն նաև այն մարդիկ, որ դեռ ապստամբության օրերին չէին ընդունում ծռերի ընտրած մեթոդները և շարունակում են չընդունել նաև այսօր։ Ստացվում է՝ ամեն ինչ այնքան էլ միանշանակ չէ, և բոլորն էլ ունեն իրենց սպասումները։ Նման իրավիճակում, մնում է ասել, կողմերը Փաշինյանից կարող են ակնկալել միայն մի բան՝ անաչառություն։
Քրիստինե Հովսեփյան
