Գրենլանդիայում սառցադաշտերի հալումը անդառնալի է դարձել: Այս մասին գրում է «Ինտերֆաքս»-ը ՝ հղում անելով Օհայոյի պետական համալսարանի գիտնականների ուսումնասիրությանը:
Բանն այն է, որ սառույցի հալման արագությունն ու ծավալն այնքան մեծ են դարձել, որ ձյան տեղումներն այլևս չեն կարողանա փոխհատուցել այս գործընթացը: «Գրենլանդիայի սառցադաշտերը հատել են կետը, որի դեպքում ձնաբուքը, որը սովորաբար լրացնում էր հալած սառցե շերտը, այլևս չի կարող փոխարինել այն ծավալի սառցե կտորներին, որոնք սառցադաշտերից սահում են դեպի օվկիանոս», – ասվում է ուսումնասիրության մեջ:
Հետազոտությունն անցկացրած գիտնականները նաև նշում են, որ 21-րդ դարում Գրենլանդիայի հալվող սառույցը կարող է լինել օվկիանոսի մակարդակի բարձրացման հիմնական պատճառը:
1980-ականներից մինչև 1990-ականների վերջերը Գրենլանդիան կորցրել է մոտ 450 միլիարդ տոննա սառույց, բայց ձյան տեղումները լրացրել են այն։ Սակայն այժմ այն տարեկան կորցնում է 500 միլիարդ տոննա սառույց, և ձյան տեղումները այլևս չեն կարողանա փոխհատուցել դա:
Միայն Գրենլանդիայի հալվող սառույցը կարող է հանգեցնել 2100 թվականին օվկիանոսի մակարդակի 10-12 սանտիմետրով բարձրացմանը։
Նյութը՝ esquire.ru, թարգմանություն՝ Կարեն Կոլոսով