Սերժ Սարգսյանի հարսնաքարյան ասուլիսին հաջորդել է ԱԺ նախկին փոխխոսնակ Արփինե Հովհաննիսյանի «կարևորագույն դրվագի պարզաբանումը»։ Այլ կերպ ասած՝ «շեֆի» ասուլիսը փոքրիկ «կորեկցիայի» է ենթարկել տիկին Հովհաննիսյանը՝ անհասկանալի է՝ ավելի ըմբռնելի դարձնելու համար երրորդ նախագահի խոսքը, թե ասուլիսի թողած տխուր տպավորություններն ավելի ընդգծելու համար։
Ակնհայտ է՝ հանրապետականներին դուր չի եկել քառօրյայի օրերին անմահացած հերոսների ընտանիքներից ներողություն խնդրելու լրագրողի թեթևակի ակնարկը, քանզի ներողություն խնդրելը մեղավորության գիտակցում է, որին պատրաստ չէ ոչ միայն Սերժ Սարգսյանը, այլ նաև նրա կառավարած վարչախումբը։
Հանրույթը նման ազնվության դրսևորում չի էլ ակնկալում 2017 թվականի ապրիլի սկզբին՝ զոհվածների մահվան տարելիցին, ընտրություններում տարած հաղթանակ տոնող և «սալյուտ խփող» հանրապետականներից։ Պետք չէ ջանքեր գործադրել և վերամբարձ խոսքեր շռայլել՝ հայտարարելով մեծ պատասխանատվության զգացումի մասին, ժողովուրդը երկար ժամանակ է ունեցել հետևություններ անելու համար։
Իսկ սեփական իրավունքների մասշտաբայնության մասին թյուր կարծիք ունեցող հանրապետական տիկնոջը պետք է խորհուրդ տալ՝ մնալ իր լիազորությունների տիրույթում, քանզի, հնարավոր է, որ Արփինե Հովհաննիսյանին իրավունք է վերապահվել պարզաբանել Սերժ Սարգսյանի մտքերը, բայց լրագրողների հարցադրումների ճիշտն ու սխալը, «պատեհն» ու «անպատեհը», ո՞ւմ, ե՞րբ, ի՞նչ հարցնելը նրա որոշելիքը չէ։
Քրիստինե Հովսեփյան
