Օգոստոսի 23-ին ամերիկյան Քենոշա (Վիսկոնսին նահանգ) քաղաքում ոստիկանությունը ծանր հրազենային վնասվածքներ է հասցրել 29-ամյա աֆրոամերիկացի Ջեյքոբ Բլեյքին: Ականատեսներից մեկը նկարահանել է դեպքը և տեղադրել այն համացանցում: Տեսաձայնագրության մեջ երևում է, որ սևամորթը քայլում է դեպի մեքենան: Նրա հետևից ատրճանակները պարզած երկու ոստիկան է գնում, ովքեր ինչ-որ բան են պահանջում։ Երբ տղամարդը բացում է մեքենայի դուռը, ոստիկաններից մեկը քաշում է նրա վերնաշապիկից և մեջքից 7 անգամ կրակում է: Մեքենայի մոտակայքում գտնվող կանայք բղավում են։
Անմիջապես դեպքի վայրում հավաքվեցին հարևանները։ Նրանց միացան այլ թաղամասի բնակիչներ ու աֆրոամերիկացիների իրավապաշտպան շարժումների ակտիվիստներ: Մոտ 100 ցուցարար շարժվեց դեպի քաղաքային ոստիկանության շենքի մոտ, որտեղ հանդիպեցին ոստիկանական արգելքի։ Իշխանությունները երեկոյան ժամը 10-ից հայտարարեցին պարետային ժամ, սակայն բողոքի ցույցերը շարունակվեցին մինչ ուշ գիշեր։ Ցուցարարները այրեցին 3 աղբատար մեքենա, կոտրեցին մի քանի գրասենյակների պատուհաններ ու գրաֆիտի նկարազարդումներ արեցին դատարանի շենքի վրա։ Հաջորդ օրը ակցիան շարունակվեց։ Ինչ-որ մեկը հրկիզել է մի քանի շինություն, Քենոշա բերվեցին ԱՄՆ ազգային գվարդիայի զինյալները։
Ջեյքոբ Բլեյքը, որի վնասվածքից սկսվեց ամեն ինչ, ծանր վիճակում տեղափոխվել է Միլուոքի հիվանդանոց: Նրան վիրահատել են, վիճակը կայուն է և գտնվում է ինտենսիվ թերապիայի մեջ: Վիսկոնսինի արդարադատության նախարարությունը հետաքննություն է սկսել: Երկու (ըստ այլ աղբյուրների ՝ երեք) ոստիկանության ծառայողներ, որոնք գտնվել են դեպքի վայրում, հեռացվել են աշխատանքից: Իշխանությունները չեն բացահայտել նրանց անունները, և դեռ չեն հայտնել, թե ինչն է նախորդել կրակոցներին: Հայտնի է միայն, որ ոստիկանները ժամանել են կենցաղային բնույթի վեճի ահազանգով։
Բլեյքի ընտանիքը որպես փաստաբան վարձել է Բենջամին Քրամպին, ով հայտնի է ոստիկանության կողմից բռնությունների զոհ դարձաց քաղաքացիների գործերով: Քրամպը հայտարարել է, որ Բլեյքն օգնում էր հանդարտեցնել ընտանեկան վեճը, բայց ոստիկանությունը զենք է պարզել նրա վրա և էլեկտրահարել է։ Կրակոցներն արձակվել են այն ժամանակ, երբ Բլեյքը գնում էր ստուգելու մեքենայում նստած երեք որդիներին (Բլեյքն ունի վեց երեխա): Տղաները, ովքեր երեք, հինգ և ութ տարեկան են, տեսել են, թե ինչպես են իրենց հորը կրակում։ «Սա մեծ հոգեբանական վնաս է ողջ կյանքի ընթացքում», – նշել է փաստաբանը:
This is 29-year-old Jacob Blake who was shot by Kenosha police. His fiancé shared this picture with us. pic.twitter.com/6Si9lkCPFu
— Sarah Thamer (@SarahThamerNews) August 24, 2020
Քրամփի վարկածը հաստատում են նաև ականատեսները։ Նրանք պատմում են, որ Բլեյքը փորձում էր դադարեցնել երկու կանանց միջև տեղի ունեցող վեճը, իսկ ոստիկանները սկզբում էլեկտրական հարված հասցնող զենքով են վնասել վերջինիս, ապա սկսել են կրակել։
Բլեյքի բուժման և իրավաբանական ծախսերի համար մեկ օրվա ընթացքում հավաքվել է 650 հազար դոլար։ Երգչուհի Քարդի Բին, ռեփեր 50 Cent-ը, բասկետբոլիստ Լեբրոն Ջեյմսը և այլ հայտնիներ կոչ են արել դադարեցնել ոստիկանական բռնությունները։ Մի քանի դեմոկրատ քաղաքական գործիչներ, այդ թվում նախագահի թեկնածու Ջո Բայդենը դատապարտել են Քենոշայի ոստիկանության գործողությունները: Վիսկոնսինի նահանգապետ Թոնի Իվերսը նահանգի օրենսդիր մարմնի արտակարգ նիստ է հրավիրել՝ ոստիկանության կողմից ուժի գործադրումը կարգավորող օրենքների փաթեթ ընդունելու համար:
Նյութը՝ meduza.io, թարգմանություն՝ Կարեն Կոլոսով
