Եթե ԲՀԿ-ն ձևավորի կառավարություն

ԲՀԿ ղեկավար Գագիկ Ծառուկյանի վերջին օրերի բուռն գործունեությունն ու այցելությունները մարզեր քննարկումների պատճառ են հանդիսացել։ Մի մասը պնդում է, որ Գագիկ Ծառուկյանը նման գործելաոճով նպաստում է ՀՀ երկրորդ նախագահ Ռոբերտ Քոչարյանի քաղաքական նկրտումներին, մյուս մասն էլ կարծում է, որ Գագիկ Ծառուկյանը փորձում է խուսափել արդարադատությունից։

Չգիտես ինչու իշխում է կարծիք, որ Գագիկ Ծառուկյանը առաջիկա ընտրություններում կառավարություն ձևավորելու հնարավորություններ չունի։ Հավանաբար պատճառը տարիներ շարունակ կուսակցությանը բնորոշող «կցորդի» կարգավիճակն է, որ բոլոր իշխանությունների հետ էլ վարել է «հարմարվողական» քաղաքականություն։ Կամ՝ դեռ բոլորը հիշում են 2015 թվականի Ծառուկյանի «համարձակ» նախաձեռնությունը, որ ավարտվեց դեռ չսկսած՝ անմիջապես ՀՀԿ-ի կողմից ձեռնարկվեց հայտնի «պրոցեսը», և Ծառուկյանը ոչ միայն նահանջեց, այլ հեռացավ քաղաքականությունից անորոշ ժամանակով։ Այն ժամանակ Ծառուկյանը և նրան մոտ կանգնած մարդիկ պարզաբանեցին, որ ԲՀԿ առաջնորդին սպառնացել են փակել բոլոր բիզնեսները, ձերբակալել են աշխատակիցներին…

Ինչևէ՝ այժմ կրկին «ակտիվություն» է դրսևորում «Բարգավաճ Հայաստան» կուսակցությունը՝ «գերագույն առաջնորդի» մակարդակով՝ հանդիպումների միջոցով շոշափելով հասարակական կարծիքները։ Հատկանշական է, որ «ակտիվի հետ զրույցներին» զուգահեռ, գործին են լծվել նաև համացանցային ֆեյք-հրոսակախմբերը՝ ստեղծելով Ծառուկյանի «իմաստուններից ամենաիմաստունի» դիմանկարը։ Չի բացառվում, որ շուտով հայտնվեն «Գագիկ Ծառուկյան- վարչապետ» շապիկներով մարդիկ (հիշեցնենք՝ դեռ շաբաթներ առաջ ԲՀԿ-ն սկսել էր Ծառուկյանի նկարով անվճար շապիկներ բաժանել ցանկացողներին), որ պահանջում են ներկայիս իշխանությունների հրաժարականը։

Ընդամենը մի աննշան հարց է առաջանում՝ եթե ԲՀԿ-ն, այդուամենայնիվ, կառավարություն ձևավորի, ո՞վքեր են գալու իշխանության։ Տարընթերցումներից խուսափելու համար նշեմ, որ նկատի ունեմ կուսակցության բարեկամա-խնամիա-քավորական խառը հարաբերությունները, որ սերտաճած են Ռոբերտ Քոչարյանի և Սերժ Սարգսյանի մերձավոր շրջապատի հետ։ Այսինքն՝ ովքեր էլ ստանձնեն առանցքային պաշտոնները, միանշանակ տեղի կունենա ոչ թե իշխանափոխություն, այլ նախկինների վերադարձ, որ դեռևս ոգևորում են կուսակցական «մտահոգներին» կուլիսներից։

Քրիստինե Հովսեփյան