Աշխարհազորում կընդգրկվեն մինչև 70 տարեկան անձինք

Տարբեր մարդկանց կողմից տարածվում են կեղծ լուրեր նոր ստեղծվող աշխարհազորի մասին, որոնք իրականության հետ ոչ մի աղերս չունեն։ Նախաձեռնությունը միտված է նախապատրաստելու բնակչությանը հնարավոր մարտական գործողություններին։

«Չգիտեմ ինչից է ենթադրությունը վերցված, որ պետք է քաղաքում կամ համայնքներում շրջեն զինված մարդիկ, նման բան գոյություն չունի։ Այո, մենք ենթադրում ենք, որ սպառազինության քանակը համապատասխան կցագրման վայրերում ավելացնելու ենք, որ անհրաժեշտության դեպքում կարողանանք զենք բաժանել»,- հրավիրված ասուլիսում ասաց ՀՀ պաշտպանության փոխնախարար Գաբրիել Բալայանը՝ նշելով, որ քաղաքացիներին ազատ շրջանառության զենք չի տրվելու։

Ստեղծվող աշխարհազորի ներգրավվումը լինելու է բացառապես մարտական գործողությունների, ռազմական անմիջական սպառնալիքի առկայության դեպքում, քանի որ Ապրիլյան պատերազմի ժամանակ ունեցել ենք նախադեպ, երբ մարդիկ հավաքվում և ինքնակամ մեկնում էին առաջնագիծ՝ ավելի շատ վնասելով, քան օգտակար լինելով մարտի դաշտում։

Փոխնախարարի խոսքով՝ սպառազինությունը բաժանվելու է աշխարհազորում կցագրված քաղաքացիական անձանց միայն այն պարագայում, երբ մարտական գործողություններ են սկսվում կոնկրետ բնակավայրում։ Նախատեսվում է, որ մինչև 70 տարեկան անձինք կընդգրկեն աշխարհազորում, ովքեր ստանալու են համապատասխան հանձնարարություն և օգտվելու են համապատասխան սոցիալական երաշխիքներից։

Քրիստինե Հովսեփյան