Դեռևս հերքումներ չեն հնչել

Վերջին շրջանում Գագիկ Ծառուկյանի ակտիվ հանդիպումների ֆոնին մամուլ սպրդած «Շանգրի լա» խաղատան տուգանքի մասին լուրը կարծես թե սառը ցնցուղի էֆեկտ է ունեցել։ Ստացվում է՝ ակտիվության ցուցադրությունը պատահական չէ և բացահայտում է, թե որտեղ է թաղված շան գլուխը։

Իհարկե, կարելի է հավատալ Ծառուկյանի ազնիվ մղումներին, որ մտահոգված է կրթական բարեփոխումներով, նոր չափորոշիչներով, հայապահպանությամբ, ամեն րոպե սպառնացող սովով, տնտեսության անկումով, բայց եթե հետադարձ հայացք ձգենք, կտեսնենք, որ Ծառուկյանի ցանկացած «մտահոգ» հայտարարություն ուղեկցվում է որևէ քրեական գործով։

Չենք բացառում, որ այս անգամ մամուլում շրջանառվող լուրը ստահոդների շարքից է, բայց Գագիկ Ծառուկյանի կուսակցությունից դեռևս հերքումներ չեն եղել, համենայն դեպս Իվետա Տոնոյանը, որ աչալուրջ հետևում է հասարակական տրամադրություններին և լրատվամիջոցների անազնիվ գործելաոճին, առայժմ լռում է։

Միայն Գևորգ Պետրոսյանը չի դիմացել և իր ծննդյան օրով մի քանի «խրատական» տող է նվիրել վարչապետ Նիկոլ Փաշինյանին՝ ապսպրելով «տեր կանգնել» ազգականներին, որ հղում անելով մամուլին, խախտում են անմեղության կանխավարկածը։

Չգիտեմ՝ ինչքանով են թեժ աշնան մասին խոստումներն արժանահավատ, բայց որ արդեն համացանցային գզվռտոցների պակաս չկա, համոզվում ենք ինքներս։

Քրիստինե Հովսեփյան