Հայտնի են կառավարության որոշմամբ պատվովճար ստացող տիտղոսակիր մարզիկները

ԿԳՄՍ-ն հրապարակել է Կառավարության վերջին որոշմամբ պատվովճար ստացող տիտղոսակիր մարզիկների ցանկը:

«ՀՀ ԿԳՄՍ նախարարության առաջարկով` Հայաստանի Հանրապետության կառավարության 2015 թվականի օգոստոսի 13-ի N 925-Ն որոշման մեջ կատարվել են փոփոխություններ, ինչի արդյունքում Հայաստանի Հանրապետության քաղաքացի հանդիսացող, սակայն Հայաստանի Հանրապետությունում մշտապես չբնակվող՝ օլիմպիական խաղերի և շախմատի համաշխարհային օլիմպիադայի չեմպիոնները և մրցանակակիրները, Հայաստանի Հանրապետության և նախկին Խորհրդային Միության հավաքական թիմերի կազմերում՝ օլիմպիական խաղերի ծրագրում ընդգրկված մարզաձևերի, ինչպես նաև ոչ օլիմպիական մարզաձևերից նավամոդելային սպորտի, շախմատի և սամբոյի աշխարհի առաջնություններում (նաև թիմային) չեմպիոն դարձած մարզիկներն այսուհետ կստանան ամսական պատվովճարներ: Որոշումն ընդունվել է Կառավարության սեպտեմբերի 10-ի նիստում:

Նախկինում Հայաստանի Հանրապետության քաղաքացի հանդիսացող տիտղոսակիր մարզիկները պատվովճար չեն ստացել հանրապետությունում մշտապես չբնակվելու պատճառով: Բացի դրանից՝ որոշմամբ պատվովճար է սահմանվել աշխարհի թիմային առաջնության հաղթողների համար. մասնավորապես` շախմատի աշխարհի առաջնության թիմային չեմպիոն Հայաստանի Հանրապետության հավաքականի 5 մարզիկ կստանա պատվովճար: Ընդհանուր առմամբ, ծրագրի շահառուների ցանկում ընդգրկվել է Հայաստանի Հանրապետության քաղաքացի հանդիսացող, սակայն ՀՀ-ում մշտապես չբնակվող 15 մարզիկ (16 մրցանակային տեղ՝ Յուրի Սարգսյանը և՛ օլիմպիական խաղերի 2-րդ մրցանակակիր է, և՛ աշխարհի չեմպիոն) և շախմատի աշխարհի առաջնության թիմային չեմպիոն 5 մարզիկ:

«Հայաստանի Հանրապետության կառավարության 2015 թվականի օգոստոսի 13-ի N 925-Ն որոշման մեջ փոփոխություններ կատարելու մասին» ՀՀ Կառավարության որոշմամբ` պետությունը ևս մեկ անգամ կարևորում է սպորտի զարգացումը և տիտղոսակիր մարզիկների նվաճումները` անկախ այն հանգամանքից նրանք մշտապես բնակվում են ՀՀ-ում, թե ոչ, քանի որ նրանք, հանդես գալով Հայաստանի դրոշի ներքո, բարձր են պահել Հայաստանի Հանրապետության և նախկին Խորհրդային Միության պատիվը և այսօր էլ հանդիսանում են Հայաստանի Հանրապետության քաղաքացիներ:

Կից` Օլիմպիական խաղերի և շախմատի համաշխարհային օլիմպիադայի չեմպիոնների ու մրցանակակիրների, ինչպես նաև Հայաստանի Հանրապետության և նախկին Խորհրդային Միության հավաքական թիմերի կազմերում՝ Օլիմպիական խաղերի ծրագրում ընդգրկված մարզաձևերի, ինչպես նաև ոչ օլիմպիական մարզաձևերից շախմատի աշխարհի առաջնություններում չեմպիոն դարձած մարզիկների ցանկը

Ցուցակ
N	Անուն, ազգանուն	Զբաղեցրած տեղը	Պատվովճարի ամսական չափը հազար դրամ
Օլիմպիական խաղեր
1	Էդուարդ Ազարյան	1-ին տեղ	200,000.00
2	Արմեն Նազարյան	1-ին տեղ	200,000.00
3	Էդուարդ Միքայելյան	2-րդ տեղ	140,000.00
4	Յուրի Սարգսյան	2-րդ տեղ	140,000.00
5	Արմեն Մկրտչյան	2-րդ տեղ	140,000.00
6	Միհրան Հարությունյան	2-րդ տեղ	140,000.00
7	Սոս Հայրապետյան	3-րդ տեղ	100,000.00
8	Յուրի Պատրիկեև	3-րդ տեղ	100,000.00
9	Հրաչիկ Ջավախյան	3-րդ տեղ	100,000.00
10	Գևորգ Դավթյան	3-րդ տեղ	100,000.00
Շախմատի համաշխարհային օլիմպիադա
11	Վլադիմիր Հակոբյան	1-ին տեղ	200,000.00
12	Սերգեյ Մովսիսյան	1-ին տեղ	200,000.00
Աշխարհի առաջնություն
13	Նշան Մունչյան	1-ին տեղ	100,000.00
14	Արայիկ Գևորգյան	1-ին տեղ	100,000.00
15	Դեվիդ Սաֆարյան	1-ին տեղ	100,000.00
16	Յուրիկ Սարգսյան	1-ին տեղ	100,000.00
Շախմատի աշխարհի թիմային առաջնություն
17	Լևոն Արոնյան	1-ին տեղ	100,000.00
18	Վլադիմիր Հակոբյան	1-ին տեղ	100,000.00
19	Ռաֆայել Վահանյան	1-ին տեղ	100,000.00
20	Գաբրիել Սարգսյան	1-ին տեղ	100,000.00
21	Ռոբերտ Հովհաննիսյան	1-ին տեղ	100,000.00