Կառավարության այսօր ընդունած որոշումներից մեկի համաձայն, Կրթական տեխնոլոգիաների ազգային կենտրոնին (ԿՏԱԿ) կտրամադրվի մոտ 27 միլիոն դրամ: Դա հիմնավորվում է դպրոց ընդունվողների էլեկտրոնային հայտագրման եւ կրթության կառավարման տեղեկատվական միասնական համակարգերի ներդրման ու սպասարկման անհրաժեշտությամբ:
Հայտնի է, որ այս տարի առաջին դասարանցիների էլեկտրոնային հայտագրումը փորձնական տարբերակով կազմակերպվեց միայն Երեւանում: Հաջորդ տարվանից այդ սկզբունքը գործելու է ամբողջ հանրապետությունում: Ինչ վերաբերում է կրթության կառավարման տեղեկատվական համակարգին, ԿՏԱԿ տնօրեն Արտակ Պողոսյանը, մեզ հետ զրույցում մանրամասնեց. «Դա ենթադրում է կրթության բոլոր մակարդակների համար, սկսած նախադպրոցականից մինչեւ բուհական եւ հետբուհական կրթության մակարդակ, ունենալ մեկ միասնական տեղեկատվական համակարգ, որի միջոցով կհավաքագրվի վիճակագրությունը, տեղի կունենա ուսանողների, աշակերտների շարժը, բոլոր աշխատողների մասին տեղեկատվությունը եւ այլն: Ներկայումս մենք շահագործում ենք դպրոցների կառավարման տեղեկատվական համակարագը, որի մի մասն էլ նաեւ առաջին դասարանցիների ընդունելությունն էր»։
Ավելին՝ armtimes.com
