Ալեն Սիմոնյանը համոզված է՝ Գագիկ Ծառուկյանի ֆեյսբուքյան էջում հայտնված գրառումը վերաբերում է Ծառուկյանի թիմակցին՝ Պետրոսյան Գևորգին, քանի որ մամուլում և համացանցում մշտապես տեղեկություններ են պտտվում, որ պատգամավորը առողջական խնդիրներ է ունեցել մշտապես, նույնիսկ նախարարի պաշտոն զբաղեցնելու ժամանակահատվածում։
«Հիմա, կարծում եմ, որ Գագիկ Ծառուկյանի բուռն քաղաքական գործունեության վերելքի շրջանում նա փորձում է վեր հանել նորից նման հարցեր,որպեսզի քաղաքական գործունեության իմիտացիա ձևավորի»,- լրագրողների հետ զրույցում մեկնաբանեց փոխխոսնակը։
Վերջինիս խոսքով՝ եթե Ծառուկյանի գրառումը վերաբերվում է վարչապետին, ապա Ծառուկյանը պետք է համարձակություն ունենար անուն նշելու կամ ավելի հստակ գրելու։ Պարոն Սիմոնյանը նույնիսկ վստահ չէ, որ այդ էջը պատկանում է ԲՀԿ ղեկավարին։
Լրագրողի նկատառմանը, որ հուշագրի ստորագրման ժամանակ իշխող քաղաքական թիմն արդյո՞ք տեղյակ չէր Ծառուկյանի անցյալից, Սիմոնյանը պատասխանեց. «Այդ տեղեկությունները Ծառուկյանի հետ կապված, որ նա դատապարտված է եղել բռնաբարության համար եկեղեցու տարածքում, ինչպես նաև կողոպուտի, հայտնվել են շատ ավելի ուշ քան ձեր նշած իրադարձությունները»։
Սիմոնյանը շեշտեց՝ եղել է հեղափոխություն, տարբեր դերակատարներ են եղել, բոլորին տրվել է հնարավորություն մաքուր էջից սկսելու, և բոլորը ունեցել են հնարավորություն իմանալ «իրենց յորղանի չափը»։
Քրիստինե Հովսեփյան
