«Կանդիդատը» Արթուր Վանեցյանը չէ՝ գործընկերոջ հետ համամիտ է Ռուբեն Ռուբինյանը

«Հայրենիք», «Բարգավաճ Հայաստան» և «Հայ Յեղափոխական Դաշնակցություն» կուսակցությունները չեն կարող լայն ուժեր մոբիլիզացնել, և դրա պատճառները կուսակցությունները պետք է փնտրեն իրենց անցյալում, ներկայում և այլ տեղերում։ Իսկ եթե նույնիսկ լինեին մեծ դժգոհություններ, ապա այս քաղաքական միավորները չեն կարող համախմբել  ժողովրդին՝ կարծում է ԱԺ Արտաքին հարաբերությունների հանձնաժողովի նախագահ Ռուբեն Ռուբինյանը։

Վերջինս լրագրողների հետ զրույցում նշեց, որ իր դիտարկմամբ, համավարակի պատճառով առաջացած դժգոհություններն ու մնացած բոլոր խնդիրներն այդքան մեծ չեն, որպեսզի նշյալ ուժերը միավորեն հասարակության մեծ հատվածին։

«Մի կուսակցության ամբողջ պատմությունը խարսխված է մի դրվագի վրա՝ կար ԱԱԾ տնօրեն, որը հեռացվեց աշխատանքից, որը հետագայում նեղսրտած ստեղծեց կուսակցություն և հետագայում սկսեց խոսել այս կամ այն ուժերի հետ համագործակցելու մասին։ Այսպիսի պատմություն»,- «Հայրենիք» կուսակցության ողջ գործունեության ընթացքը մի քանի բառով շարադրեց Ռուբինյանը։

Իսկ Վանեցյանի՝ ռուսական գործակալ լինելու մասին «Դոսյե»-ի հրապարակման մեջ եղած ակնարկների մասով նկատեց, որ կիսում է իր գործընկեր Հրաչյա Հակոբյանի այն կարծիքը, որ «Կանդիդատը» Արթուր Վանեցյանը չէ։

Քրիստինե Հովսեփյան