ՌԴ արտաքին հետախուզական ծառայությունը ճշգրիտ տեղեկություններ ունի մարտական գոտում ահաբեկիչների ներկայության մասին, այդ թվում՝ Մերձավոր Արևելքից և Սիրիայից։ Այս մասին հայտարարել է ՌԴ Արտաքին հետախուզական ծառայության ղեկավար Սերգեյ Նարիշկինը Ռիա Նովոստիին տված հարցազրույցում։
Վերջինիս խոսքով՝ այս տվյալներն իրենք ստանում են մի շարք երկրներից, տարբեր աղբյուրներից և տարբեր գործընկերներից, Միջին Արևելքում, Մերձավոր Արևելքում գործընկեր ծառայություններից։
Հիշեցնենք՝ երեկ՝ հերթական բրիֆինգի ժամանակ, Ռուսաստանի ԱԳՆ պաշտոնական ներկայացուցիչ Մարիա Զախարովան նույնպես անդրադարձել էր Մերձավոր արևելքից Լեռնային Ղարաբաղի հակամարտության գոտի տեղափոխված միջազգային ահաբեկչական կազմակերպությունների անդամներին, որոնց ձեռքերը մինչև արմունկներ արյունոտ են։
Նշենք, որ հայկական կողմն ունի կենդանի ապացույցներ՝ ռազմական գործողությունների ընթացքում գերեվարվել են երկու վարձկան ահաբեկիչներ, որոնց նկատմամբ հարուցվել են քրեական գործեր։
Նկատենք, որ Վարձկանության մասին 1989 թվականին ընդունված ՄԱԿ-ի բանաձևով պետություններին արգելվում է հավաքագրել և օգտագործել վարձկան ահաբեկիչների։ Հատկանշական է, որ նույն բանաձևում ամրագրված է նաև, որ պետությունները չեն կարող ազգերի ինքնորոշման իրավունքը ճնշելու համար օգտագործել վարձկան ուժեր։ Նրանց ներգրավվումը կոնֆլիկտում կարող է դիտարկվել որպես ցեղասպան գործողության նախադեպ։
Քրիստինե Հովսեփյան
