Երևանի ավագանու «Իմ քայլը» խմբակցության անդամ Իզաբելլա Աբգարյանը ֆեյսբուքյան իր էջում գրել է․
Ինչքան հայտարարություն է արվել տարիների ընթացքում ԵԱՀԿ Մինսկի խմբի կողմից ՄԻՇՏ տեքստում «վերահաստատում ենք, որ հիմնախնդիրը չունի ռազմական լուծում» պնդումն է եղել:
Ու եթե այս հարթակը իրապես միջազգայնորեն լիազորված՝ վերջնական կարգավորման փաստաթուղթը մշակողն ու հաստատողն է, ապա ռազմական լուծման փորձի արդյունքում ադրբեջանի տիրապետության տակ անցած, բայց մինչ այդ բանակցային սեղանին դրված փաստաթղթում որպես նրանց տարածքային ամբողջականության մաս չհանդիսացող տարածքները չեն կարող մնալ նրանց վերահսկման տակ:
Նույնիսկ ՄԱԿի տխրահռչակ բանաձևերով, որոնք տականքները մեր աչքն էին մտցնում, այդ տարածքները ՉԵՆ ԵՂԵԼ ադրբեջանի տարածքային ամբողջականության մաս:
Այս հայտարարությունները բազմիցս վերահաստատվել են նաև թե Պուտինի, թե՜ Մակրոնի, թե ԱՄՆ նախագահների շուրթերով և գրչով:
Ադրբեջանի կողմից հարձակումը սկսելը նույնպես արձանագրվել է նրանց կողմից:
Թուրքիայի կողմից միջամտելը՝ զենքի ու ահաբեկիչների ներմուծման տեսքով նույնպես հաստատել են երեք պետություններն էլ՝ տարբեր մակարդակներում:
Ռազմական հանցագործությունները արձանագրվել են ՄԱԿի Մարդու իրավունքների հանձնակատարի շուրթերով:
Այս ամենը հաշվի առնելով, ես փոքր հույս եմ փայփայում, որ վերջնական լուծումը և փաստաթուղթը, որի տակ պետք է լինեն նաև երեք համանախագահ պետությունների ստորագրությունները, տարբերվելու է այն հրադադարի հայտարարության թղթից, որի տակ չկան ոչ Ֆրանսիայի, ոչ էլ ԱՄՆի ստորագրությունները:
Փրփուրների՞ց եմ կախվում: Ոչ: Մերժում եմ միջազգային բեսպրեդելը և հավատում եմ միջազգային իրավունքի պահպանմանը:
Այլապես սա նախադեպ կլինի այլ թեժ կետերի համար, պետություններն էլ այլևս չեն նստի բանակցելու, այլ միմիյանց բնաջնջման համար կզինվեն:
