Սնկից թունավորումներից և հետագա բարդություններից խուսափելու նպատակով առողջապահության նախարարությունը կրկին զգուշացնում է.
1.սննդում չօգտագործել անհայտ ծագման սունկ,
2.չհավաքել սունկ ճանապարհների եզրերից,
3.ուտելի և թունավոր սունկը տարբերակելու համար հիմք չընդունել նկարները, քանի որ թունավոր սնկերը շատ հաճախ աճում են ուտելի սնկերի մոտ և կարող են արտաքին տեսքով շատ նման լինել,
4.սնկերը տարբերակելու համար հիմք չընդունել ժողովրդական առասպելները, ըստ որոնց թունավոր սնկերին չեն մոտենում միջատները և այլ կենդանիները կամ եփելու ընթացքում արծաթը սևանում է և սևացնում է սնկային արգանակը,
5.չուտել հում սունկ,
6.երեխաներին չկերակրել սնկով,
7.աղեստամոքսային համակարգի խնդիրներ ունեցող մարդկանց խորհորդ չի տրվում սննդում օգտագործել սունկ,
8.սնկի հետ չօգտագործել ալկոհոլ, քանի որ այն ակտիվացնում է մի շարք թունավոր նյութեր,
9.թարմ սնկերը 1 օրից ավելի չպահել` նույնիսկ սառնարանային պայմաններում,
10.չզբաղվել ինքնաբուժմամբ։
Հիշեցնենք, որ հուլիսի 2-ին «Մարտունու» բժկական կենտրոն էին դիմել Մարտունի քաղաքի նույն ընտանիքի 5 անդամներ: Քաղաքացիները հոսպիտալացվել էին վերակենդանացման բաժանմունք, նրանց մոտ ախտորոշվել էր «սուր էկզոգեն թունավորում սնկից»:
Հիվանդները կերել էին անտառից իրենց կողմից հավաքված սունկ: Նրանցից երկուսը նույն օրը դուրս է գրվել, մյուսները գտնվում են ընդհանուր բաժանմունքում՝ շարունակելով բուժումը:
