Ապրեցնել Արցախը հայերեն․․․
Վերջին օրերին լսածս թերևս ամենագեղեցիկ արտահայտությունն է՝ հնչեցված բուժումը կիսատ թողած և ապրելու համար Արցախ տեղափոխված Մանե Թանդիլյանի կողմից։
Հրաժարական պահանջող խելագարված ամբոխների ամենօրյա աղմուկից հետո, երբ ժողովուրդը կորցրել է վստահությունը բոլոր գործող անձերի նկատմամբ, բացառիկ է նախկին նախարարի և պատգամավորի դրսևորած մասնագիտական սառնասրտությունը և, ինչու ոչ, նաև մարդկային առաքինությունը, երբ մեղադրանքների տարափի փոխարեն, առաջին հերթին շտապում է օգնության աղետի կիզակետում գտնվող մեր հայրենակիցներին, որոնք պետական հոգածության, նաև անձնազոհ պատրաստակամությամբ աշխատանքին նվիրվող կամավորների կարիք ունեն։
Մանե Թանդիլյանն առաջիններից է, բայց հուսանք, որ վերջինը չէ, ով իր մասնագիտական գիտելիքներով և աշխատանքային ահռելի փորձով կսատարի հայկական պետություններին և կաշխատի համատեղ ջանքերով ճգնաժամը հաղթահարելու ուղղությամբ։
Գաղտնիք չէ, որ ժամանակահատվածը ճակատագրական է հայկական պետությունների ինքնիշխանության պահպանման համար, ուստի կառավարող ուժերն էլ պետք է ցուցաբերեն իմաստնություն՝ սպառնացող ներհայաստանյան պառակտումից խուսափելու, քաղաքական ընդդիմախոսների հետ երկխոսություն սկսելու, բաց լինելու և հարաբերվելու եզրեր գտնելու համար։
Քրիստինե Հովսեփյան