ԱԺ «Իմ քայլը» խմբակցության պատգամավոր Հայկ Կոնջորյանը ֆեյսբուքյան իր էջում գրել է.
Այսօր ժողովուրդ օրաթերթը մի հոդված է երկնել, թե իբր ես ԵԱՀԿ խորհրդարանական վեհաժողովում մեր ռուս գործընկերների հետ խոսել եմ անգլերեն և թե նրանք դրանից դժգոհել են։ Պաշտոնապես հայտարարում եմ, որ դա կեղտոտ սուտ է և տեղեկատվական կեղտոտ պատերազմի հերթական գարշելի օրինակն է։ ԵԱՀԿ խորհրդարանական վեհաժողովում, որին մասնակցում են 57 անդամ պետությունների շուրջ 400 պատգամավորեր, նիստերի հիմնական աշխատանքային լեզուն անգլերենն է։
Ահա այդ նիստերի ընթացքում ես խոսում եմ անգլերեն, որպեսզի առանց թարգմանության հասկանալի լինեմ մասնակիցների համար։ Իսկ մեր ռուս և ռուսախոս գործընկերների հետ աշխատանքային քննարկումներում և անձնական շփումներում, խոսել և խոսում եմ բացառապես ռուսերեն։ Այս օրերին պղտոր ջրում ձուկ որսացողների պակաս չկա, ուստի, սիրելի հայրենակիցներ, մի տրվեք տեղեկատվական սադրանքներին։
