Լամբադա կամրջի խճճված ելքերից մեկի մոտ գտնվող «Էպիգրաֆ» գրախանութը դարձել է հանդիպումների շատ հետաքրքիր մի խաչմերուկ, որտեղ տիրում է արվեստն ու գրականությունը

«Էպիգրաֆը» գործում է մոտ մեկ տարի և արդեն հասցրել է գտնել իր յուրահատուկ լսարանն ու շրջապատը: Ճարտարապետական և նկարչական ուղղվածություն ունեցող խանութում վաճառվում են մասնագիտական և գեղարվեստական գրքեր, նկարչական պրոֆեսիոնալ պարագաներ, որակյալ իտալական թղթեր և ավելին։ Oրինակ՝ հայտնի DOM Publishers հրատարակչության ճարտարապետական գրքերն առաջին անգամ են ներկայացվում Հայաստանում և կարելի է գտնել միայն «Էպիգրաֆում»: Կան նաև տեղական հրատարակություններ, ամենալայն տեսականին «Սարգիս Խաչենց — ՓրինթԻնֆոյինն» է։ Գրախանութի կողմից արտադրվող սթիքերները հասցրել են իրենց այցեքարտը դառնալ։

Հիմնադիրները երեք երիտասարդներ են՝ ճարտարապետ, ֆիզիկոս և նկարիչ, իսկ հետո արդեն թիմին միացել են մյուսները: «Երբ գործով գալիս են, տեսնում են, որ բոլորս երիտասարդ երեխեք ենք, ասում են՝ թե բա ձեր մենեջերին կանչեք, ու պետք է իրենց դեմքը տեսնեք, երբ իրենց առջև դուրս է գալիս է փոքրիկ, նուրբ մի աղջիկ և ներկայանում է որպես մենեջեր»,- պատմում է ճարտարապետ Արինեն: Բոլոր որոշումներն ընդունում են միասին: Ինչ նոր նախաձեռնություն անել, ինչ հրապարակել կայքում և մի շարք այլ հարցեր սուրճի բաժակի շուրջ քննարկելուց հետո արագ անցնում են իրագործմանը։

Ավելին՝ evnmag.com