Շրջակա միջավայրի նախարարության նախանշած առաջնահերթությունների մեջ պատերազմի ընթացքում և պատերազմից հետո վերանայումներ են կատարվել, քանի որ պատերազմը բերեց մի շարք գործոններ, որոնք բնապահպանական ռիսկերի նախադրյալներ ստեղծեցին Արցախի և Հայաստանի սահմանային շրջաններում։ Այս մասին ասուլիսի ընթացքում հայտնեց նախարար Ռոմանոս Պետրոսյանը։
Նա նշեց՝ նախարարության կարևորագույն խնդիրներից է Սևանի էկոհամակարգի վերականգմանն ուղղված լայն գործընթացների մեկնարկը, այդ թվում՝ Սևանի առափնյա տարածքներում ապօրինի կառուցված շենք – շինությունների ապամոնտաժման, անտառապատ գոտիների ջրածածկ գոտիներից հեռացման և ափամերձ տարածքների մաքրման հարցերը։
Պետրոսյանի խոսքով՝ 2004 թվականից ի վեր՝ առաջին անգամ, կառավարության որոշմամբ, կիրառվեց արդյունագործական ձկնորսության պիլոտային ծրագիր և սեպտեմբերից մինչև դեկտեմբերի 1՝ ձվադրման ընթացքում, ձկնորսության թույլտվություն ստացան ձկնորսները։ Արդյունքում՝ լճի ողջ երկայնքով կահավորվել է 25 դիտակետ և արդյունագործական նպատակով որսված սիգը կշռվում է տեսուչների կողմից, որից հետո միայն դուրս է բերվում ներքին և արտաքին շուկա։
Նախարարը հավելեց՝ «Սևան» ազգային պարկում մի շարք ծրագրեր են իրականացվել՝ ձևավորվել է շուրջօրյա պահնորդական նոր ստորաբաժանում, որը հերթապահություն է իրականացնում՝ ձկնագողության և անտառագողության դեպքերը կանխելու համար։
Նաև ցուցակագրվել և գույքագրվել են առափնյա շենք – շինությունները, և շահառուները ստացել են համապատասխան ծանուցումներ։ Եթե քաղաքացիները չապամոնտաժեն ապօրինի շինությունները, ապա «Սևան» ազգային պարկը սեփական միջոցներով կձեռնարկի այդ աշխատանքները։
Ռոմանոս Պետրոսյանը մանրամասնեց՝ արդեն երկու տարի բյուջեով 208 մլն դրամ է տրամադրվում Շրջակա միջավայրի նախարարությանը՝ կապալառուների միջոցով Սևանի ափամերձ տարածքների մաքրման համար, սակայն անցած տարի հայտնաբերված առերևույթ խախտումների պատճառով, այդ գործընթացը կանգնեցվել է։ Փաստաթղթերի ուսումնասիրությունից հետո նախարարությունը դադարեցրել է վճարումները կապալառու ընկերություններից մեկին, և փաստաթղթերը ուղարկվել են Դատախազություն։
Առերևույթ խախտումների և չարաշահումների փաստերով քրեական գործեր են հարուցվել, որից հետո գումարները վերադարձվել են պետական բյուջե։ Այս տարի ևս բյուջեով նույն գումարն է հատկացվել, սակայն նախարարությունը մտադիր է հանդես գալ նախաձեռնությամբ՝ առաջարկելով այդ գումարները ուղղել պարկի՝ սեփական կարողությունների ընդլայնմանը։ Այսինքն, բացառելով կապալառուների և երրորդ կողմի ներգրավումը, «Սևան» ազգային պարկի ընդլայնված ռեսուրսներով իրականացնել մաքրման աշխատանքները՝ ապահովելով կայուն աշխատատեղեր։
Քրիստինե Հովսեփյան
