Երևանի բոլոր վարչական շրջաններում պետք է տեղադրվեն թափոնների տեսակավորման թափոնամաններ, նախատեսվում է, որ մինչև փետրվարի վերջ 135 կետերում կտեղադրվեն այդ աղբամանները։ Այս մասին ասուլիսի ընթացքում հայտնեց Հայկ Հովհաննիսյանը։
Վերջինիս խոսքով՝ քաղաքացիները տեսակավորված թափոնները՝ թուղթը, պլաստիկը և ապակին կարող են տանել իրենց վարչական շրջանում գտնվող կետ և թափոնամանների մեջ նետել։
Այս պահի դրությամբ, բացառությամբ Մալաթիա, Շենգավիթ և Նուբարաշեն վարչական շրջանների, փաստացի կա տեղակայված թափոնների տեսակավորման 60 կետ։
Բանախոսը նշեց, որ մարդկանց շրջանում արդեն որոշ չափով իրազեկման աշխատանքներ կատարվել են, որին մեծապես նպաստել և աջակցել են հասարակական կազմակերպությունները։
Հովհաննիսյանը նկատեց, որ բնակիչները մեծ ոգևորությամբ են արձագանքում գործընթացին և փորձում են տեսակավորել թափոնները։ Երբեմն խնդիրներ առաջանում են՝ բնակիչները անփութություն են դրսևորում կամ միտումնավոր թափոնները խառնում են, սակայն իրազեկման աշխատանքները դեռ ավարտված չեն, ուստի պետք է զինվել համբերությամբ և բացատրական աշխատանքներ տանել քաղաքացիների հետ։
Քրիստինե Հովսեփյան
