Դատարանը Արմեն Գևորգյանին չթույլատրեց քաղաքական ելույթ ունենալ

«Մարտի 1»-ի գործով  դատավարության ժամանակ այսօր ամբաստանյալներից նախագահի աշխատակազմի նախկին ղեկավար Արմեն Գևորգյանը միացավ իր փաստաբանի՝ դատավոր Դանիբեկյանին բացարկ հայտնելու միջնորդությանը՝ ելույթում հնչեցնելով քաղաքական գնահատականներ` անդրադառնալով նաև Արցախյան վերջին պատերազմին:

«Այս ողջ դատական պրոցեսը եղել է մի հրեշավոր ծրագրի կարևոր օղակներից մեկը, հրեշավոր ծրագիր, որ ենթադրում էր բաժանել հասարակությունը սևի ու սպիտակի…»,- իր հայտարարության մեջ ասաց ամբաստանյալ Արմեն Գևորգյանը:

Սակայն դատավոր Աննա Դանիբեկյանը չթույլատրեց շարունակել ելույթը՝ նշելով, որ նրա հայտարարությունները դուրս են գալիս դատավարության շրջանակներից: «Դատարանը պետք է ընդհատի, քանի որ քննարկում եք միջնորդությանը չվերաբերող թեմաներ, և մի՛ վերածեք դատավարությունը քաղաքական հարցերի քննարկման»,- ասաց դատավոր Դանիբեկյանը՝ զգուշացնելով, որ եթե նա շարունակի ելույթը նույն ոճով, կզրկվի ձայնի իրավունքից:

Գևորգյանը, սակայն, շարունակեց ելույթը. «Ես ուզում հայտարարել, որ այսուհետ այս դատարանն ինձ համար հայտարարում եմ ապօրինի, անօրինական և ընդհանրապես հրաժարվում եմ այսուհետ ձեզ հետ որևէ ձևով առնչվել»: