Ունեցել ենք հանդիպումների շարք հետևյալ օրակարգով՝ «արտահերթ ընտրությունների հետ կապված խնդիրները»․ Հովիկ Աղազարյան

«Թե ինչից եկանք մենք այն եզրակացության, որ հանրային մեծ պահանջ չկա արտահերթ ընտրությունների անցկացման այս պահին համենայն դեպս, շատ պարզ պատասխան ունի այդ հարցը։ Որովհետև մենք պատգամավորներով մեծ թվակազմով խմբակցություն ունենք, և, հետևաբար, յուրաքանչյուրս ունեցել ենք հանդիպումների շարք մեր ընտրողների հետ մեր ընտրատարածքներում, և մենք այդ հանդիպումների արդյունքում եկել ենք այն եզրակացության, որ այս պահին հանրային պահանջ չկա։ Դա է պատասխանը»,- հայտարարել է Հովիկ Աղազարյանը ճեպազրույցի ընթացքում։

Պատգամավորը մանրամասնել է․

«Ասենք, եթե գնում ենք որևէ համայնք հանդիպման, նախաձեռնվում է հանդիպում հետևյալ օրակարգով՝ «արտահերթ ընտրությունների հետ կապված խնդիրները»։ Բնականաբար, հանդիպման են գալիս այդ համայնքի էն քաղաքացիները, որոնք ավելի ակտիվ են, ավելի մոտ են կանգնած այդ գործընթացներին։ Նրանք են ներկա լինում հիմնականում և իրենց հետ քննարկման ժամանակ պարզվում է, որ այդ պահանջն այսօր չկա։ Միգուցե սա քիչ է, բայց այլ տարբերակ էլ չկա։ Մյուս տարբերակը կարող ենք ասել հետևյալը, որ ընդդիմադիր մեր գործընկերները, երբ որ կազմակերպում էին հանրահավաքներ, էտ հանրահավաքները շատ մեծ աջակցություն չստացան։ Դա էլ կարող ենք ասել, բայց այս պատասխանը կլիներ լրիվ անբավարար, հետևաբար մենք կազմակերպեցինք էս ընթացքում հանդիպումներ մեր ընտրողների հետ և եկանք այդ եզրակացության։ Բացի այդ՝ եթե մենք գնում ենք արտահերթ ընտրությունների՝ ըստ Սահմանադրության, և սա ԼՀԿ-ի և ԲՀԿ-ի համար ընդունելի չի, նրանք և նրանց կոչով այլ կուսակցություններ բոյկոտեն, բա հետո՞։ Դրա համար մենք ասում ենք՝ պետք է կոնսենսուս լինի»։

Քրիստինե Հովսեփյան