Ընդդիմությունը ունի ցածր վարկանիշ, այդ պատճառով վիժեցրեց արտահերթ ընտրությունների գնալու առաջարկը. Սիմոնյան

Եթե կան մարդիկ, ուժեր, ովքեր արտահերթ ընտրությունների անհրաժեշտություն են տեսնում, իրենք պետք է այդ հարցով դիմեն «Բարգավաճ Հայաստան» կուսակցությանը, «Լուսավոր Հայաստան» կուսակցությանը, արտախորհրդարանական ընդդիմությանը, այլ ոչ թե իշխանությանը: Լրագրողների հետ զրույցում ասաց ԱԺ փոխխոսնակ Ալեն Սիմոնյանը՝ անդրադառնալով արտահերթ ընտրություններ չանցկացնելու վերաբերյալ «Իմ քայլը» խմբակցության հայտարարությանը:

Փոխնախագահը նշեց, որ արտահերթ ընտրություններ չանցկացնելու վերաբերյալ հանրային պահանջի վերաբերյալ եզրակացություն են արել հարցումների, հանդիպումների միջոցով: «Իմ ունեցած տեղեկություններով՝ մեր ընդդիմադիր գործիչները նույնպես ունեն հարցումներ և գիտեն, թե հանրության մեջ ինչ տրամադրություններ կան, և կարող եմ ձեզ գաղտնիք բացել. ընդդիմության բոլոր հարցումների տվյալներով՝ իրենք ունեն շատ ցածր վարկանիշ, և դա է հիմնական պատճառը, որ իրենք վիժեցրեցին վարչապետի առաջարկը՝ գնալ արտահերթ ընտրությունների»,- հավելեց նա՝ նշելով նաև, որ վարչապետ Փաշինյանն ունի ամենաբարձր վարկանիշը:

Նա նաև ասաց, որ երբ ընդդիմադիրները պատրաստ կլինեն քննարկել արտահերթ ընտրությունների անցկացման հարցը, իրենք նույնպես համաձայն կլինեն այն քննարկել:

Հիշեցնենք, որ վարչապետ Նիկոլ Փաշինյանի հետ հանդիպում ունենալուց հետո «Իմ քայլը» խմբակցությունը հայտարարել էր, որ արտահերթ ընտրությունների անցկացման պահանջ հանրային լայն շրջանակներում չկա: Հայտարարության մեջ նաև ասվում էր, որ արտահերթ ընտրություններ անցկացնելու գաղափարը բացասաբար է ընդունվել խորհրդարանական ընդդիմության շրջանում: