Վարչապետ Նիկոլ Փաշինյանը շնորհավորական ուղերձներ է հղել Իրանի Իսլամական Հանրապետության նախագահ Հասան Ռոհանիին եւ Իսլամական հեղափոխության գերագույն առաջնորդ Սեյյեդ Ալի Խամենեիին՝ Իսլամական հեղափոխության հաղթանակի 42-րդ տարեդարձի կապակցությամբ:
Իրանի նախագահ Հասան Ռոհանիին ուղղված շնորհավորական ուղերձում նշված է.
«Ձերդ Գերազանցություն,
Ջերմորեն շնորհավորում եմ Ձեզ եւ Իրանի բարեկամ ժողովրդին՝ Իսլամական հեղափոխության հաղթանակի 42-րդ տարեդարձի կապակցությամբ:
Հայաստանի եւ Իրանի միջեւ դարավոր բարեկամությունն ու պատմական խոր ավանդույթները լավագույն հիմքն են փոխշահավետ համագործակցության զարգացման եւ խորացման համար:
Տարածաշրջանում ստեղծված բարդ աշխարհաքաղաքական իրավիճակն առավել մեծ կարեւորություն է տալիս երկկողմ փոխշահավետ ծրագրերի շուտափույթ եւ լիակատար իրականացմանը՝ ի շահ մեր ժողովուրդների եւ տարածաշրջանի:
Մաղթում եմ Ձեզ քաջառողջություն եւ հաջողություններ, իսկ Իրանի բարեկամ ժողովրդին՝ բարեկեցություն եւ խաղաղություն»:
Իսլամական հեղափոխության գերագույն առաջնորդ Սեյյեդ Ալի Խամենեիին ուղղված շնորհավորական ուղերձում ասված է.
«Ձերդ Վսեմություն,
Ջերմորեն շնորհավորում եմ Ձեզ եւ Իրանի բարեկամ ժողովրդին՝ Իսլամական հեղափոխության հաղթանակի 42-րդ տարեդարձի կապակցությամբ:
Տարածաշրջանում ստեղծված բարդ իրավիճակը նորովի է կարեւորում մեր ժողովուրդների միջեւ առկա բարեկամությունը եւ փոխադարձ հարգանքը՝ հնարավորություն ընձեռելով առավել խոր փոխգործակցության:
Հայաստանը վճռական է բարեկամ Իրանի հետ առաջ մղելու երկկողմ փոխշահավետ համագործակցությունը՝ ի շահ մեր ժողովուրդների եւ տարածաշրջանի:
Ձերդ Վսեմությանը մաղթում եմ քաջառողջություն եւ արեւշատություն, իսկ Իրանի բարեկամ ժողովրդին՝ խաղաղություն եւ առաջընթաց»:
