Որևէ հուշարձանի նկատմամբ նման ոտնձգությունը միանգամայն անընդունելի և դատապարտելի արարք է. Մարության

Երևանի քաղաքապետ Հայկ Մարությանը գրառում է արել Ֆեյսբուքի էջում՝ անդրադառնալով Օղակաձև զբոսայգում հայ և հրեա ժողովուրդների ցեղասպանությունների զոհերի հուշարձանի պղծման փաստին:

«Այսօր առավոտյան տեղեկացանք, որ անհայտ չարագործները պղծել են Երևանի Օղակաձև զբոսայգում գտնվող՝ հայ և հրեա ժողովուրդների ցեղասպանությունների զոհերի հուշարձանը:

Որևէ հուշարձանի նկատմամբ նման ոտնձգությունը միանգամայն անընդունելի և դատապարտելի արարք է, որը պետք է բացառել մեր քաղաքից:

Երևանում տարբեր ազգությունների ներկայացուցիչներ հարյուրամյակներ շարունակ ապրել են կողք կողքի՝ իրենց ազգային պատկանելության հետ հպարտությամբ կրելով նաև երևանցի լինելու պատվաբեր կոչումը, և որևէ մոտիվ չի կարող խաթարել այդ համերաշխությունը:

Հուսով եմ, իրավապահ մարմինները արագ և համարժեք արձագանք կտան»,- գրել է Մարությանը: