Ինչպես արդեն տեղեկացրել ենք, վերջին օրերին Սևանա լճում արձանագրվել է Անաբենա (լատ.՝ Anabaena) ցեղի կապտականաչ ջրիմուռների աճ։ Այս ջրիմուռները Սևանա լճում առաջին անգամ նկատվել են նախորդ դարի 40-ականներին, իսկ ծաղկման առաջին դեպքն արձանագրվել է 1964 թվականին և տարբեր ծավալներով պարբերաբար կրկնվել նաև այլ տարիներին։ Լայնածավալ ծաղկում է դիտարկվել նաև 2018 թվականին։ Այս տարի, ի տարբերություն նախորդնորի, լիճը գրեթե ամբողջությամբ կանաչ գույն է ստացել, ինչը լայն քննարկումների առիթ է դարձել ոչ միայն հասարակության տարբեր շրջաններում, այլև իր վրա է կենտրոնացրել միջազգային մամուլը: Սևանա լճի ներկայիս բնապահպանական սոսկալի վիճակին երեկ անդրադարձել է հեղինակավոր BBC-ն՝ Armenia’s iconic lake faces algae threat հոդվածում: Ներկայացվել են հայ բնապահպանների մտահոգությունները, անդրադարձ է կատարվել շրջակա միջավայրի նախարարության գործողություններին:
Հիշեցնենք, որ Սևանա լճի խնդիրը այսօր վաղ առավոտից թեժ քննարկվում է նաև ԱԺ արտահերթ նիստում: Պատգամավորներից Թագուհի Թովմասյանը նույնիսկ պատրաստակամություն հայտնեց գնալ Սևանա լիճ և անհրաժեշտության դեպքում հատ առ հատ պոկել բոլոր ջրիմուռները:
