ԱՄՆ կոնգրեսական Ջեքի Սփիրն ու Քիմ Քարդաշյանը կհամատեղեն Հայոց ցեղասպանության ճանաչման ջանքերը

Ինչպես արդեն տեղեկացրել էինք, Քիմ Քարդաշյանը ցանկանում է Հայոց ցեղասպանության միջազգային ճանաչման գործընթացը իր առաքելությունը դարձնել:
Ամերիկյան ռեալիթի շոուի աստղը The Wall Street Journal-ին տված ծավալուն հարցազրույցում ասել էր. «Ես ցանկանում եմ հայոց ցեղասպանության միջազգային ճանաչման գործընթացը դարձնել իմ առաքելությունը։ Հայրիկս ինձնով շատ կհպարտանար»:

Քարդաշյանը, ով բացի հեռուստատեսային աստղ լինելուց, զբաղվում է նաև ԱՄՆ-ում քրեական արդարադատության բարեփոխումների հարցերով, նշել է, որ վերջերս հաղորդագրություն է ուղարկել ԱՄՆ նախագահ Դոնալդ Թրամփի փեսային՝ Ջարեդ Քուշներին, ով նաև Թրամփի խորհրդականն է՝ խնդրելով քննարկել այս հարցը: The Wall Street Journal-ը հայտնում է, որ Հայոց ցեղասպանության ճանաչման հարցով Քիմ Քարդաշյանին է դիմել կոնգրեսական Ջեքի Սփիրը՝ ակնկալելով այս հարցում Քարդաշյանի աջակցությունը։ «Եթե դու կարողանաս հասնել նրան, որ նախագահը ճանաչի ցեղասպանությունը, այն կլինի բեկումնային՝ Կոնգրեսում ցեղասպանության բանաձևերի ընդունման համար»,-ասել է կոնգրեսականը։

Նշվում է, որ մոտ օրերս Քարդաշյանը հյուրընկալվելու է Սպիտակ տանը՝ քննարկելու քրեական արդարադատության հետ կապված հարցեր, և խոստացել է անդրադառնալ նաև Հայոց ցեղասպանության խնդրին։