Երեք օր խորհրդարանը կորցրեց Վճռաբեկ դատարանի դատավորների ընտրության գործի վրա

Երեք օր խորհրդարանը կորցրեց Վճռաբեկ դատարանի դատավորների ընտրության գործի վրա, որը աբսուրդ է՝ խորհրդարանական ճեպազրույցի ժամանակ հայտարարեց ԼՀԿ ղեկավար Էդմոն Մարուքյանը։ Վերջինս նշեց՝ վատնված ռեսուրս և վատնված շասեր մի երկրում, որը ոչ մի ռեսուրս վատնելու իրավունք և շքեղություն չպետք է թույլ տա։

«Պատկերացնում եք ի՞նչ ռեսուրս է ծախսում պետությունը։ Օրենսդիր իշխանությունը հանրային ամբողջ ուշադրությունը զբաղեցնում մի թեմայի վրա և վերջում Վճռաբեկ դատարանի որևէ դատավոր չի ընտրվում ուղղակի բոյկոտի պատճառով», – ասաց պատգամավորը՝ հավելելով, որ իր համար անհասկանալի է նման մոտեցումը։

Մարուքյանը հարց հնչեցրեց՝ եթե անգամ իշխող «Իմ քայլը» խնդիր ունի ԲԴԽ նախագահի հետ, ի՞նչ կապ ունեին Վճռաբեկ դատարանի դատավորների թեկնածուներն այդ ամենի հետ։

Պատգամավորի խոսքով՝ Ռուբեն Վարդազարյանը երբեք իր հերոսը չի եղել, բայց ստացվում է, որ երբ «Իմ քայլը» ուզում էր Վարդազարյանը դառնա ԲԴԽ նախագահ, մտածում էին՝ նա պետք է իրենց հրահանգները կատարի, և հիմա բողոքի ձայն են հնչեցնում, քանի որ ԲԴԽ նախագահը իշխող ուժի հրահանգները չի կատարում․

«Էստեղ անազնիվ մոտեցում կա։ Մենք ուզո՞ւմ ենք ունենալ արդար, անկախ դատական իշխանություն, թե՞ ուզում ենք ունենալ կամակատար դատական իշխանություն, որից իշխանությունը գոհ կլինի»։

Մարուքյանը ընդգծեց՝ ամբողջ աշխարհում կա մի հետաքրքիր ինդիկատոր՝ եթե իշխանությունը կամ քաղաքական մեծամասնությունը քննադատում է դատական իշխանությանը, ուրեմն դատական իշխանությունը լավ է աշխատում։ «Իմ քայլի» պատգամավորները իրենց պահվածքով ուղերձ տվեցին միջազգային կառույցներին, որ այս դատական իշխանությունը լավ է աշխատում, որովհետև եթե դատական իշխանությունը գործադիրի համար է աշխատում, իշխանությունը չի բողոքում։

Քրիստինե Հովսեփյան