ԱՄՆ վարչակազմը պատմական փաստ է համարում, որ Իսրայելը 1967-ի պատերազմի ժամանակ գրավեց Գազայի հատվածը, Հորդանան գետի արևմտյան ափը և Արևելյան Երուսաղեմը: Այս մասին երկուշաբթի հերթական ճեպազրույցում հայտարարել է Պետդեպարտամենտի մամուլի ծառայության ղեկավար Նեդ Փրայսը, տեղեկացնում է ТАСС-ը:
«Սա պատմական հարց է: Չի կարելի ժխտել, որ Իսրայելը 1967 թ. պատերազմի ժամանակ գրավեց Հորդանան գետի ափը, Գազայի հատվածը, Արևելյան Երուսաղեմը: Մեր դիրքորոշումը երկու պետության հաստատումն է, համաձայն որի՝ Իսրայելը պետք է խաղաղ ապրի պաղեստինյան պետության հետ»,- ասել է նա՝ չներկայացնելով մանրամասները:
Դոնալդ Թրամփի նախագահության օրոք Վաշինգտոնը ճանաչեց Երուսաղեմը որպես Իսրայելի մայրաքաղաք և հրեական պետության գերիշխանությունը սիրիական Գոլանի բարձունքների վրա, Հորդանան գետի արևմտյան ափին հրեական բնակավայրերի կառուցումը դադարեց համարել միջազգային իրավունքի խախտում: 2020 թվականի սկզբին Թրամփը հայտարարեց պաղեստինա-իսրայելական խաղաղ կարգավորման իր ծրագրի հիմնական դրույթների մասին, որը ենթադրում է երկու պետությունների փոխադարձ ճանաչում, Պաղեստինի տարածքի կրկնակի մեծացում, զինված պայքարի մերժում, միաժամանակ Երուսաղեմը պետք է ճանաչել Իսրայելի «անբաժանելի մայրաքաղաք», Արևելյան Երուսաղեմը՝ (խոսքը Երուսաղեմի Աբու Դիս արվարձանի մասին է), արաբական պետության:
