ՀՀ քննչական կոմիտեի Սյունիքի մարզային քննչական վարչության Գորիսի քննչական բաժնում քննվող քրեական գործով կատարված մեծածավալ քննչական և դատավարական այլ գործողությունների արդյունքում պարզվել են Վերիշեն բնակավայրի բնակչի կողմից համագյուղացու առողջությանը դիտավորությամբ ծանր մարմնական վնաս պատճառելու, ինչպես նաև վերջինիս կնոջ նկատմամբ բռնաբարության փորձ կատարելու դեպքի մի շարք հանգամանքներ:
Նախաքննությամբ պարզվել է, որ 2021թ. ապրիլի 7-ին՝ ժամը 00:15-ի սահմաններում, Գորիս համայնքի Վերիշեն բնակավայրի 30-ամյա բնակիչը բնակարանում գտնվող անձանց կամքին հակառակ, տան մուտքի դարպասին հարակից պատուհանի տախտակը հանելու միջոցով ապօրինի մուտք է գործել համագյուղացու տուն, որի ննջասենյակում, վերջինիս կնոջ կամքին հակառակ, նրա՝ քնած լինելով պայմանավորված անօգնական վիճակն օգտագործելով, փորձել է սեռական հարաբերություն ունենալ նրա հետ, սակայն իր կամքից անկախ հանգամանքներով հանցավոր մտադրությունն ավարտին չի հասցրել, քանի որ կինը, ապա՝ նաև վերջինիս ամուսինը արթնացել են քնից: Այնուհետև 30-ամյա տղամարդն իր մոտ գտնվող սուր կտրող-ծակող առարկայով մեկ անգամ դիտավորությամբ հարվածել է տանտիրոջ կրծքավանդակին` պատճառելով կյանքի համար վտանգավոր ծանր մարմնական վնաս:
Ձեռք բերված բավարար ապացույցների համակցությամբ՝ Վերիշեն համայնքի 30-ամյա բնակչին մեղադրանք է առաջադրվել՝ ՀՀ քրեական օրենսգրքի 112-րդ հոդվածի (դիտավորությամբ առողջությանը ծանր վնաս պատճառելը) 1-ին մասով, 34-138-րդ հոդվածի (բռնաբարության փորձ) 1-ին մասով և 147-րդ հոդվածի (բնակարանի անձեռնմխելիությունը խախտելը) 1-ին մասով: Վերջինս կալանավորվել է:
Նախաքննությունը շարունակվում է:
Ծանուցում. Ենթադրյալ հանցանքի մեջ կասկածվողը կամ մեղադրվողը համարվում է անմեղ, քանի դեռ նրա մեղավորությունն ապացուցված չէ ՀՀ քրեական դատավարության օրենսգրքով սահմանված կարգով` դատարանի` օրինական ուժի մեջ մտած դատավճռով:
