Համացանցում տարածվող լուրերը, որ Սյունիքից ավելի քան 100 անձ է բերման ենթարկվել, չի համապատասխանում իրականությանը, բերման է ենթարկվել ընդամենը 2-3 սյունեցի։ Այս մասին լրագրողների հետ զրույցում ասաց փոխոստիկանապետ Արա Ֆիդանյանը։
«Առկա է առերևույթ հանցագործության կատարման դեպքեր, որի կապակցությամբ Ոստիկանության կողմից, և ոչ միայն Ոստիկանության, կատարվում են համապատասխան միջոցառումներ»,- հայտնեց Ֆիդանյանը՝ անդրադառնալով նախօրեին Սյունիքում տեղի ունեցած բողոքի ակցիաներին։
Փոխոստիկանապետի խոսքով՝ այս պահի դրությամբ կալանավորվածներ չկան, քանի որ բերման ենթարկված անձանց անմիջապես չի շնորհվում դատավարական կարգավիճակ։ Եթե նախաքննության ընթացքում մերժվի այն մոտեցումը, որ տեղի ունեցածում խուլիգանություն առկա չէ, որևէ գործողություն անձի նկատմամբ չի իրականացվի։
Լրագրողի այն հարցին, թե արդյոք ճնշում չէ, որ Նիկոլ Փաշինյանը բացահայտ ուղղորդեց կամ հանձնարարեց ուժային կառույցների ղեկավարներին պատժել միջադեպի մասնակիցներին, Ֆիդանյանը հակադարձեց․
«Եթե կա առերևույթ հանցագործության դեպք, ապա, միանշանակ է, որ պետք է իրավապահ մարմինները ձեռնարկեն համապատասխան բոլոր անհրաժեշտ միջոցառումները տվյալ առերևույթ կատարված հանցագործության դեպքը բացահայտելու և հետագայում կանխարգելելու համար»։
Քրիստինե Հովսեփյան
