ՀՀ գլխավոր դատախազի խորհրդական Գոռ Աբրահամյանը ֆեյսբուքյան իր էջում գրել է․
Քիչ առաջ armlur.am-ը, կրկին հղում անելով իր անանուն աղբյուրներին ինչ-որ զառանցանք է գրել իբրև թե ՀՀ գլխավոր դատախազի տեղակալի և Երևան քաղաքի դատախազի միջև կոնֆլիկտի, միմյանց հարվածներ հասցնելու, ինչպես նաև, իբրև թե ՔԿ Գեղարքունիքի մարզային քննչական վարչության պետի կողմից մարզի դատախազին հարվածելու մասին:
Ընդ որում՝ կայքը նյութը հրապարակել է իբրև կատարված իրողություն, մինչդեռ դա հաստատող որևէ փաստ, բնականաբար չի նշել և այն պարագայում, երբ պաշտոնապես հերքվել էր առնվազն դատախազության կողմից:
Ավելորդ է ասել, որ գրվածը երկու դեպքերի մասին էլ բացարձակ սուտ է, ավելի ճիշտ հիմար և օդից վերցրած սուտ: Եվ խմբագրության կողմից մոգոնվել է՝ ընդամենը նյութի սկզբում բարբաջելու համար, թե դատախազությունը բարոյալքման շեմին է, իրենց համար ցանկալին ամեն գնով որպես իրականություն ներկայացնելու մարմաջով:
Զավեշտալի է, որ բարոյալքումից խոսում է մի լրատվամիջոց, որը սուտը, կեղծիքը դարձրել է իր հիմնական գործիքը, լրատվամիջոցը վերածել առանձին անհատների, կառույցների դեմ ստահոդ, սադրիչ ու վարկաբեկիչ հերյուրանքներ տարածելու կեղտոտ լվացքատան:
