Քոչարյանը և իր աջակիցներն արձագանքելու են ագրեսիվ, եթե ընտրությունները կեղծվեն

«Իշխանությունը պետք է իմանա՝ յուրաքանչյուր քայլ ընտրությոնները կեղծելու համար, այնպիսի մի արձագանք է ստանալու, որի տակից ինքը դուրս չի գալու։ Եվ այդ արձագանքը պիտի լինի ագրեսիվ, վճռական և, ի միջի այլոց, եթե այդ հարցը պահանջի ձևով ձևավորված լինի, ոչ մի իշխանություն երբեք այդ քայլին չի գնա, ռիսկ չի անի՝ հասկանալով, թե ինչ հետևանքներ է ունենալու։ Ես չեմ կարծում, որ իրենք այսօր բավարար ռեսուրս ունեն նման կարգի քայլերի գնալու համար։ Հենց միանգամից հարցը պետք ա լուծել այլ ճանապարհով»,- ասել է Ռոբերտ Քոչարյանն իր աջակիցների հետ հանդիպման ժամանակ՝ շեշտելով, որ ամեն ինչ նրանցից է կախված։

Այդուհանդերձ, երկրորդ նախագահից այսպիսի հայտարարություններ առաջիկա մեկ ամսում շատ կլսենք, որովհետև նա տեսակով մարտչող է և պատրաստվում է կատաղի կռիվ մղել իշխանության հասնելու ճանապարհին։ Թեպետ ասվածում ճշմարտության հատիկ կա՝ իրենք պատասխանելու են ագրեսիվ և վճռական այն դեպքում, եթե ընտրությունների արդյունքները երկրորդ նախագահին չբավարարեն, այլ կերպ ասած՝ եթե Քոչարյանը «չկրի»։  Քանզի կրկին ճիշտ է Քոչարյանն այն պնդման մեջ, որ իշխանությունը բավարար ռեսուրս չունի ընտրակեղծարարության համար։

«Հարցը պետք է լուծել այլ ճանապարհով»,- ասել է Ռոբերտ Քոչարյանը։ Վախենում եմ հարցնել՝ ո՞ր ճանապարհով, չնայած յուրաքանչյուրը ինքնուրույն կարող է եզրահանգումներ անել՝ աչքի առաջ ունենալով Քոչարյանի կառավարման տարիները և վերջինիս կողմից քանիցս գործադրված մեթոդները։ Ամեն դեպքում, հայտարարությունը ժողովուրդը ընկալեց որպես նախազգուշացում, իսկ աջակիցները, ենթադրելի է, որպես մարտակոչ։

Քրիստինե Հովսեփյան