Ինչպես արդեն հայտնել ենք, այսօր Երեւան քաղաքի ընդհանուր իրավասության դատարանում՝ դատավոր Աննա Դանիբեկյանի նախագահությամբ, սկսվեց Ռոբերտ Քոչարյանի և Արմեն Գևորգյանի գործով դատական նիստը:
Գործով դատախազ Պետրոս Պետրոսյանը Էրիկ Ալեքսանյանի ներկայացրած միջնորդությանն ի պատասխան, որով առաջարկում էր հետաձգել այսօրվա նիստը, քանի որ Արմեն Գևորգյանը ստանում է ամբուլատոր բուժում, նշեց, որ առաջարկի վերաբերյալ առարկություն չունի։
Ինչ վերաբերում է Վարդևանյանի արտահայտած տեսակետին, նա ասաց, որ որևէ հիմք չկա նիստը տևական ժամանակով ընդհատելու։
«Ազատ ընտրական գործընթացները դատական գործընթացների հետ որևէ աղերս չունեն։ Անձինք ընտրելու և ընտրվելու սահմանադրական իրավունք ունեն։ Այդ անձինք կարող են լինել կալանավորված, ձերբակալված, ազատության մեջ։ Դրանով պայմանավորված՝ չի կարելի զուգահեռ անցկացնել, որ բոլորը պետք է ունենան հավասար հնարավորություններ ընտրական գործընթացներին մասնակցելու համար և չի կարող հիմք հանդիսանալ դատական նիստերը տևական ժամանակով հետաձգելու համար»,- ասաց դատախազը։
Ի պատասխան դատախազի՝ Վարդևանյանը նշեց, նախընտրական շրջանում նշանակված նիստերը կարող են խոչընդոտել Քոչարյանի հանդիպումներին և քարոզարշավն իրականացնելուն․
«Խոսքը ընդամենը 3 դատական նիստի մասին է: Մինչդեռ նախորդ տարի տարբեր պատճառներով չի կայացել 10 դատական նիստ։ Ես այդ առիթով չեմ տեսել, որ դատախազությունը մտահոգություն հայտնի։ Ես հիմա խոսում եմ ընդամենը 3 դատական նիստի մասին, ոչ թե 13 կամ 30»:
Աննա Դանիբեկյանը, անդրադառնալով Վարդևանյանի ներկայացրած միջնորդությանը, նշեց, որ Ռոբերտ Քոչարյանի պաշտպանը ոչ մի հիմնավոր պատճառ չի ներկայացրել դատական նիստերը հետաձգելու համար, և միջնորդությունը մերժվեց։
Հաջորդ դատական նիստը նշանակվեց մայիսի 25-ին՝ ժամը 13։00-ին։
