Ռուսաստանի արտգործնախարար Սերգեյ Լավրովը պաշտոնական այցով արդեն մեկնել է Տաջիկստան: Այնտեղ այսօր նախատեսվում է ՀԱՊԿ արտաքին գործերի նախարարների խորհրդի նիստը, որի ժամանակ օրակարգային կարևոր հարցեր են քննարկվելու, այդ թվում՝ հայ-ադրբեջանական սահմանի վերջին լարվածությունը:
Ինչպես հաղորդում է ТАСС-ը, Լավրովը բանակցություններ է վարելու ՀԱՊԿ-ում նախագահող Տաջիկստանի ԱԳ նախարար Սիրոջիդդին Մուխրիդդինի հետ ու մասնակցելու է նիստին: Այն համավարակի տարածումից հետո առաջին անգամ է անցկացվելու «դեմ առ դեմ» ձևաչափով:
«Այս նիստում ՀԱՊԿ անդամ պետությունների համագործակցության ընթացիկ հարցերից զատ արտգործնախարարները հանգամանորեն քննարկելու են իսրայելա-պաղեստինյան հակամարտության սրացումը, վերջերս ՀԱՊԿ անդամներ Ղրղզստանի և Տաջիկստանի սահմանին տեղի ունեցած բախումները, որոնք կողմերին հաջողվեց հարթել խաղաղ ճանապարհով, ինչպես նաև՝ հայ-ադրբեջանական սահմանին առկա իրավիճակը, որը, պաշտոնական Երևանի պնդմամբ, առաջացել է Բաքվի կողմից»,- ասված է հրապարակման մեջ:
Նշենք, որ ՀՀ ԱԳ նախարարի պաշտոնակատար Արա Այվազյանը ևս կմասնակցի ՀԱՊԿ Արտաքին գործերի նախարարների խորհրդի նիստին:
