Կապանի բժշկական կենտրոնը ամենագնաց ռեանոմոբիլներ է ստացել

ՀՀ առողջապահության նախարարության կողմից Կապանի բժշկական կենտրոնին հատկացված ամենագնաց շտապօգնության մեքենաներն այսօր տեղ հասան։ Դրանք ձեռք են բերվել պետական միջոցներով․ մեկը կտրամադրվի ԲԿ-ի հիվանդանոցին, մյուսը՝ պոլիկլինիկային։ 

Սյունիքի մարզպետարանից հայտնում են, որ մեքենաները ռեանոմոբիլներ են ու հագեցած են առաջին օգնության համար անհրաժեշտ սարքավորումներով: Դրանք կօգնեն բարելավելու բարձրլեռնային գոտիների բնակչության սպասարկման որակը, քանի որ կարող են հաղթահարել բարդ ճանապարհները։ 

Նման մեքենաների հատկացման պետական ծրագիրը շարունակական կլինի նաև մարզի մյուս համայնքների շտապօգնության ծառայությունների համար։