Ողբերգական պարադոքս է՝ մենք կարող ենք զիջել երկիրը, բայց իրար՝ ոչ

Հաղորդավար, պրոդյուսեր Հակոբ Պապիկյանը ֆեյսբուքյան իր էջում գրել է․

Անզորությունից կարկամել ենք … Եթե իրավիճակը կայունացնելու որևէ տարբերակ կա, ապա այն անհապաղ գործի է պետք դնել, հակառակ դեպքում՝ հայրենիքը կորցնելու վտանգի շուրջ անհանգստությունները կեղծ են:

Օրհասական պահին իշխանավորները(բոլոր ժամանակների) ո՛չ միավորվում են, ոչ էլ զիջում իրենց ամբիցիաները՝ հանուն երկրի փրկության: Ինչպես կարելի է մեղադրանքների ու արդարացումների, ներքին գզվռտոցների խայտառակ օրակարգով ապրել: Մենք խելքի չենք գալիս:

Ո՛չ պատմությունը, ո՛չ մեր հարևանների և գերտերությունների իրական դրսևորումները մեզ դաս չեն լինում: Չէ՛, միամիտ չենք. հասկանում ենք, որ հիմա էլ նույնն է, ինչ միշտ եղել է՝ քաղաքական (մեծ և փոքր) շահերի բախման թեժ պահ:

Հարցն այն է, թե այս անգամ ինչպե՞ս դուրս կգանք ստեղծված իրավիճակից: Ողբերգական պարադոքս է՝ մենք կարող ենք զիջել երկիրը, բայց իրար՝ ոչ: