Երեկ Արամ Խաչատրյան համերգասրահում «Իմ քայլը» հիմնադրամը դասական երաժշտության կայուն զարգացման նպատակով Համագործակցության հուշագիր ստորագրեց մեր լավագույն երաժշտական կազմակերպությունների գեղարվեստական ղեկավարների հետ: Երկու օր առաջ էլ հիմնադրամի աջակցությամբ Ազգային կինոկենտրոնի նախաձեռնությամբ «Ոսկե Ծիրան» 16-րդ միջազգային կինոփառատոնի շրջանակներում ավելի քան 20 տարի չգործող «Այրարատ» կինոթատրոնի լեփ-լեցուն ճեմասրահում բացվեց «Կինոյի Տաճար» ինստալյացիոն ծրագիրը, որով ներկայացվում են Սերգեյ Փարաջանովի հանրահայտ «Նռան գույնը» ֆիլմի մոնտաժից դուրս մնացած, վերականգնված և թվայնացված չափազանց ուշագրավ կադրերը:
Ցուցադրությունը, որն արդեն իսկ ներկայացվել է Ռոտերդամի հեղինակավոր փառատոնում, շարունակվելու է մինչև այս շաբաթվա վերջը: Սա Ազգային կինոկենտրոնի ու լեհական «Ֆիքսաֆիլմ» պրոդյուսերական ընկերության համատեղ գործունեության արդյունքն է: Նախատեսվում է վերականգնել և թվայանացնել 100 տարիների ընթացքում ստեղծված հայկական բոլոր ֆիլմերը:
Դե իսկ «Ոսկե Ծիրանի» շրջանակներում «Կինոյի տաճար» ծրագիրը Փարաջանովի երկրպագուներին հնարավորություն տվեց նաև «Մոսկվա» կինոթատրոնում դիտելու Փարաջանովի երեք կարճամետրաժ թվայնացված ֆիլմերը:
Իսկ այսօր երեկոյան, դարձյալ «Իմ քայլը», հիմնադրամի աջակցությամբ մի շատ հետաքրքիր ցուցահանդես բացվեց Ճարտարապետության ազգային թանգարան-ինստիտուտում՝ «Վաղվա քաղաքը» խորագրի ներքո: Այս ցուցահանդեսը «Գյոթե ինստիտուտի» տարածաշրջանային ամենախոշոր շրջիկ ցուցահանդեսն է: Նախագիծը պատրաստվել է մի քանի տարվա հետազոտությունների արդյունքում՝ տարածաշրջանի և Գերմանիայի մի քանի գործընկեր հաստատությունների հետ համատեղ: Ցուցահանդեսի համադրողներն են Ռուբեն Արևշատյանը, Աննա Քացը և Գեորգ Շյոլհամերը:
Ավելին՝ azatutyun.am
