Ամիսներ շարունակ փորձեր, նախապատրաստական աշխատանքներ և մեծ սպասում:
Մի քանի ժամից Ազգային ժողովի բակում կկայանա «Երևան» պատանեկան սիմֆոնիկ նվագախմբի բացառիկ համերգը:
Երևանի երաժշտական և արվեստի 25 դպրոցների շուրջ 300 սաներից կազմված նվագախումբն ու երգչախումբը հանդես կգան համերգային հետաքրքիր ծրագրով: Հնչելու են բացառապես հայ կոմպոզիտորների ստեղծագործություններ:
Երեկոյի ընթացքում սպասվում է նաև պրեմիերա: Առաջին անգամ կներկայացվի մաեստրո Տիգրան Մանսուրյանի «Երևան» ստեղծագործությունը, որը գրվել է հատուկ նվագախմբի համար: Խոսքերի հեղինակը Կարեն Անտաշյանն է:
Կոմիտասի 150 և Տիգրան Մանսուրյանի 80-ամյա հոբելյաններին նվիրված բացօթյա համերգը կկայանա այսօր՝ հուլիսի 12-ին, երեկոյան ժամը 20:30-ին: Մուտքն ազատ է:
