Հարգում ենք ժողովրդի մեծամասնության ընտրությունը և հույս հայտնում, որ այս ընտրություններով նոյեմբերի 9-ից սկիզբ առած քաղաքական ճգնաժամը ի վերջո կհանգուցալուծվի։
«Ինքնիշխան Հայաստան» կուսակցությունը հայտարարություն է տարածել 2021 թվականի հունիսի 20-ի խորհրդարանական արտահերթ ընտրությունների վերաբերյալ.
«Սիրելի՛ հայրենակիցներ,
«Ինքնիշխան Հայաստան» կուսակցությունը բարձր է գնահատում քաղաքացիների կողմից ստացած յուրաքանչյուր քվեն և հավաստիացնում, որ մեզ տրված վստահությունը պարտավորեցնող է, և այն ծառայելու է Հայաստանի զարգացմանը, հզորացմանը և միջազգային հեղինակության բարձրացմանը։
Մենք մշտապես հանդես ենք գալիս որպես բռնությունը, ատելությունը, անկայունությունը մերժող քաղաքական ուժ, ամուր կանգնած ենք պետականության և ինքնիշխանության համար ընթացող պայքարի դիրքերում, փորձում ենք հանրային օրակարգ ներմուծել նոր քաղաքական մշակույթ՝ առողջ քննադատությամբ և կառուցողական բանավեճերով:
Միաժամանակ, հունիսի 20-ին տեղի ունեցած խորհրդարանական արտահերթ ընտրությունների վերաբերյալ հարկ ենք համարում նշել, որ քարոզարշավը դարձավ մեծ ռեսուրսների պայքար, ուղեկցվեց ատելության քարոզով, անընդունելի բառապաշարով, և այս ամենն ազդեց ընտրողների բարոյահոգեբանական վիճակի վրա։ Այդուհանդերձ, հարգում ենք ժողովրդի մեծամասնության ընտրությունը և հույս հայտնում, որ այս ընտրություններով նոյեմբերի 9-ից սկիզբ առած քաղաքական ճգնաժամը ի վերջո կհանգուցալուծվի, կձևավորվի համերաշխության մթնոլորտ և կայունություն, որն էլ անվտանգության սպառնալիքները հաղթահարելու հիմք կդառնան:
«Ինքնիշխան Հայաստան» կուսակցությունը իր ընդդիմադիր գործունեությամբ շարունակելու է իր առջև դրած խնդիրների կատարումն ու կուսակցության ծրագրի իրականացման համար անհրաժեշտ քաղաքական գործունեությունը, վերահաստատում է իր հանձնառությունը Հայաստանի Հանրապետության ինքնիշխանության ամրապնդման և հզոր պետականության կերտման գործում, պատրաստ է իր հնարավորությունների սահմաններում աջակցել Հայաստանի Հանրապետությունում տեղի ունեցող բարեփոխումների անցկացմանը, բաց է համագործակցության համար բոլոր առողջ քաղաքական ուժերի և հասարակական կազմակերպությունների հետ»։
