Վաշինգտոնում Մնացականյան-Մամեդյարով հանդիպումից երկու շաբաթ անց Հայաստանի ԱԳ նախարար Զոհրաբ Մնացականյանն աշխատանքային այցով Արցախ ժամանեց։ Հուլիսի 4-ին Արցախի նախագահ Բակո Սահակյանի հետ հանդիպմանը նա նշել էր. «Մեր այս կանոնավոր աշխատանքը, կանոնավոր երկխոսությունը չափազանց մեծ նշանակություն ունի, որովհետեւ մենք այս ամենով կարողանում ենք համադրել եւ միասնական դիրքորոշումների մեջ շատ ավելի հստակ զգալ միմյանց մոտեցումները: Սա ինձ համար չափազանց կարեւոր գործառույթ է, որովհետեւ այդ գործառույթն արտահայտվում է նաեւ անմիջապես բանակցային գործընթացում: Այս անգամ մեր այցը բավական հետաքրքիր է, եւ բավական հագեցած ծրագրով ենք այսօր միասին շատ կարեւոր աշխատանք անելու: Ես կտեղեկացնեմ Ձեզ բանակցային գործընթացի շրջանակներում այս շրջանի զարգացումները եւ այն նկատառումները, որոնք կապված են մեր հիմնական հարցի հետ, գալիք ծրագրերը եւ խնդիրները, որոնք ունենք մեր առջեւ»։ Մնացականյանն իր զրուցակցին էր ներկայացրել Ադրբեջանի ԱԳ նախարարի հետ Վաշինգտոնում կայացած խորհրդակցությունների մանրամասները: Արցախի նախագահը եւ Հայաստանի ԱԳ նախարարը շեշտել են Արցախի՝ որպես հակամարտության հիմնական սուբյեկտի որոշիչ ձայնի եւ ներգրավվածության կարեւորությունը խաղաղ կարգավորման գործընթացի արդյունավետության ապահովման տեսանկյունից: Արցախի նախագահ Բակո Սահակյանի հետ հանդիպումից հետո Զոհրաբ Մնացականյանը լրագրողների հետ ճեպազրույցում հիմնավորել է Արցախի նախագահի հետ քննարկումների անհրաժեշտությունը։ «Սա չափազանց կարեւոր գործառույթ է, որովհետեւ հարցը վերաբերում է Արցախին, հարցը վերաբերում է Արցախի բնակչության անվտանգությանը, եւ Արցախը քաղաքական միավոր է, որն ունի բնակչության կողմից ընտրված իր իշխանությունները եւ իր խորագույն պատասխանատվությունն այս հարցում: Ե՛վ բանակցային գործընթացի, եւ՛ խաղաղ կարգավորման գործընթացի կոնտեքստում այդ սեփականության զգացումի ամրապնդումը բոլորիս համար չափազանց կարեւոր հարց է, եւ այդ համատեքստում է, որ ձեւավորվում է իմ այսօրվա այցի նպատակը: Դուք գիտեք, որ խաղաղ կարգավորման գործընթացը, խորհրդակցությունները եւ հանդիպումները շարունակական բնույթ են կրում, եւ այդ առումով Հայաստանը` որպես այս գործընթացի մասնակից, երբեւէ չի հապաղել եւ չի դանդաղեցրել այս գործընթացը. դա ի ցույց է դնում մեր լրջությունը խաղաղ կարգավորման գործընթացի նկատմամբ»:
ԷՄՄԱ ԳԱԲՐԻԵԼՅԱՆ
Ավելին՝ aravot.am
