Կառավարությունը այսօրվա նիստում բավարարեց հագուստի արտադրությամբ զբաղվող «Տեքսաս Փրոդաքշըն» փակ բաժնետիրական ընկերության կողմից ներկայացված հայտը՝ գերակա ոլորտում իրականացվող ներդրումային ծրագրի շրջանակներում ներմուծված (ներմուծվող) տեխնոլոգիական սարքավորումները, դրանց բաղկացուցիչ ու համալրող մասերը, հումքը և (կամ) նյութերը ներմուծման մաքսատուրքից ազատելու արտոնությունից օգտվելու վերաբերյալ:
Ըստ նախագծի հիմնավորման, արտոնությունը վերաբերում է առաջիկա երեք տարի ժամանակահատվածում ներմուծվող ապրանքներին:
Ընկերության կողմից ներմուծվող ապրանքները օգտագործվելու են հագուստի արտադրության համար։ Նախատեսվում է իրականացնել 995,3 մլն դրամի ներդրում՝ հումք ձեռք բերելու համար, ինչպես նաև ստեղծել 20 նոր աշխատատեղ` 180,000 դրամ միջին աշխատավարձով։
Ընկերությունը նախատեսում է արտահանման ծավալներով առաջատար դիրք զբաղեցնել Հայաստանում: Ծրագրով նախատեսված արտադրանքի 80%-ը նախատեսում է արտահանել ՌԴ և ԵՄ, իսկ մնացած մասը իրացնել ՀՀ-ում:
Արտոնություն ստանալու համար ներկայացված ապրանքների արժեքը կազմում է 994,1 մլն դրամ: Մաքսատուրքից ազատման արտոնությունը գնահատվում է 52 մլն դրամ:
