ԱԺ նախագահի թեկնածու Ալեն Սիմոնյանը նշել է, որ իր՝ ՔՊ-ի հիմնադիր անդամ լինելը չի խոչընդոտելու ԱԺ նախագահի պաշտոնում ընտրվելու դեպքում արմատական տարբեր մոտեցումների առկայության պարագայում ներխորհրդարանական աշխատանքները կազմակերպելուն և համագործակցությանն ընդդիմադիր խմբակցությունների հետ, քանի որ հայ ժողովրդի համընդհանուր շահի գիտակցումը գերակա է:
«Ընտրությունների անցկացման բարձր որակը փաստեցին բոլոր միջազգային դիտորդական կազմակերպությունները, հետագայում նաև ՍԴ-ն հաստատեց դրանց արդյունքները: Ուզում եմ շնորհավորել ՔՊ-ին, «Հայաստան» դաշինքին, որը, ցավոք, բացակայում է և «Պատիվ ունեմ» դաշինքին՝ խորհրդարան անցնելու առիթով»,-ասաց Սիմոնյանը:
Սիմոնյանը նշեց նաև՝ 8-րդ գումարման ԱԺ-ն աշխատանքի է անցնում երկրի համար դժվարագույն ժամանակներում, ինչը ենթադրում է ավելի բարձր պատասխանատվություն, քան երբևէ:
«Մենք պետք է արձանագրենք, որ ՀՀ ներքաղաքական հարաբերություններում ունենք բազմաթիվ անհամաձայնություններ ու տարաձայնություններ: Բայց պետք է նաև աներկբա վերահաստատենք, որ ՀՀ-ում մենք թշնամիներ չունենք և չենք կարող ունենալ»,-ասաց նա:
Սիմոնյանը հավելեց, որ թշնամանքը, ատելությունը, վիրավորանքը պետք է դուրս մղվեն ԱԺ շենքից և առհասարակ՝ առօրյայից:
«2021 թվականի հունիսի 20-ին ՀՀ քաղաքացիները չեն գնացել ընտրատեղամաս, որ մենք այստեղ իրար ատենք կամ ամբիոնից ատելության խոսք տարածենք: Բավական է, հայ ժողովուրդն առանց այդ էլ դժվար պատմական փուլ է անցնում: Եվ բոլորիս խնդրում եմ և հորդորում, որ անկախ այսօրվա քվեարկություններում գրանցված արդյունքներից՝ վերափոխվենք հանուն ՀՀ-ի, հանուն հայ մարդու: Մենք գիտենք, որ մեր երկրի անվտանգությունն առաջնային և կարևորագույն խնդիրներից է»,-ասաց նա:
Սիմոնյանը խոստացավ, որ ընտրվելու դեպքում իր առաջնային խնդիրներից է լինելու ապահովել ԱԺ-ի անխափան գործունեությունը և արդյունավետությունը:
«ԱԺ-ն այդ տեսանկյունից լավագույն հնարավորությունն է բոլորիս համար, և այստեղ նույնպես անելիքներ կան»,-նշեց նա, խոսալով արտաքին քաղաքականության մասին:
Օրենսդիր գործունեության ապահովման մասին Սիմոնյանը ասաց․
«Այսօր մենք ունենք համատեղ աշխատանքի հնարավորություն: 8-րդ գումարման ԱԺ-ի մեկնարկը յուրահատուկ զրոյական կետ է, որտեղ բոլորս մեր աշխատանքի, ոճի և ապագա անելիքի տրամաբանության ձևավորման հիմքն ենք դնելու: Ոչ մի անհնար բան մեզ համար չկա: Պետք է միայն քաղաքական կամք և գիտակցում, որ մեր երկրի ապագան կերտում ենք հիմա: Ընտրվելու պարագայում բաց եմ ձեզանից յուրաքանչյուրի հետ քննարկել ցանկացած հարց՝ ի նպաստ մեր պետության և ժողովրդի: Ես պատրաստ եմ մոռանալ փոքր տարաձայնությունները՝ հանուն մեծ նպատակի »։
