Խորհրդարանում լրագրողների աշխատանքի համար կհատկացվի երկու առանձնացված սրահ, որտեղ վերջիններս պաշտոնյաների հետ կանցկացնեն ճեպազրույցներ, հարցազրույցներ: Այս մասին լրագրողների հետ ճեպազրույցում ասաց Ալեն Սիմոնյանը՝ անդրադառնալով խորհրդարանի շենքում օգոստոսի 2-ին լրագրողների տեղաշարժի սահմանափակումներին:
Ալեն Սիմոնյանը նախ առաջարկեց սահմանափակում բառը չօգտագործել տվյալ դեպքում:
«Լրագրողների համար ապահովվելու է հնարավորություն, որ լրագրողները ստիպված չլինեն, օրինակ, քայլել պատգամավորի հետևից, որն իրենց հարցերին չի պատասխանում կամ սպասել սենյակին առջև, որ դուրս գան: Ստեղծվելու է համակարգ, որը պաշտոնյաներին բերելու է ձեզ մոտ, և ինքը միայն դրանից հետո է դուրս գալու շենքից կամ մտնելու շենք, որպեսզի լրագրողների աշխատանքը համակարգված լինի: Համաձայնեք՝ որևիցե մեկին հաճելի չէ, երբ պատգամավորը, պաշտոնյան քայլում է, օպերատորները մեծ տեսախցիկները վերցրած հետևից վազում են, լրագրողը հարց է տալիս»,-նշեց նա:
Սիմոնյանը վստահեցրեց, որ հանձնաժողովի կամ հանձնաժողովի նախագահի կողմից ընտրված անձը ամեն հանձնաժողովի նիստից հետո մոտենալու և պատասխանելու է լրագրողների հարցերին, հանձնաժողովների հյուրերը ևս ճեպազրույցներ են տալու:
Այն, որ օգոստոսի 2-ին ՊՊԾ աշխատակիցները լրագրողներին թույլ չեն տալիս միջանցքների որոշ հատվածներ գնալ՝ Սիմոնյանն խեսքով, որ դա արվում է անվտանգության նկատառումներից ելնելով։
Այն հարցին, թե ինչու հենց հիմա նման եզրահանգման եկան՝ Սիմոնյանը հիշեցրեց նախորդ տարի ԱԺ նախագահ Արարատ Միրզոյանի վրա հարձակման մասին:
