Օգոստոսի 16-ին ՀՀ ազգային ժողովի նախագահ Ալեն Սիմոնյանը հյուրընկալեց Հայաստանում Վրաստանի արտակարգ եւ լիազոր դեսպան Գիորգի Սագանելիձեին, ով ավարտում է իր դիվանագիտական առաքելությունը Հայաստանում։ Ալեն Սիմոնյանը նորհակալություն է հայտնել դեսպանին՝ դիվանագիտական ծառայության ընթացքում սերտ աշխատանքի համար։ Նաև հույս է հայտնել, որ համագործակցությունը կլինի շարունակական։
Հայաստանում Վրաստանի արտակարգ և լիազոր դեսպանն իր հերթին շնորհակալություն հայտնեց փոխշահավետ ու արդյունավետ համագործակցության համար: Գիորգի Սագանելիձեն ընդգծեց, որ հայ-վրացական փոխգործակցությունը հիմնված է երկու ժողովուրդների դարավոր բարեկամության վրա, եւ Վրաստանը կարեւորում է Հայաստանի հետ փոխշահավետ համագործակցությունը։ Ըստ նրա՝ երկու երկրներն այդ հարաբերությունները զարգացնելու մեծ ներուժ ունեն։
Առանձնահատուկ կարևոելով հայ ռազմագերիների վերադարձի ուղղությամբ Վրաստանի իշխանությունների միջնորդությունը, Ալեն Սիմոնյանը հույս է հայտնել, որ հետագայում ևս Վրաստանն այդ հարցում կցուցաբերի իր օժանդակությունը։ Այդ համատեքստում ընդգծվեց տարածաշրջանում խաղաղության հաստատման հարցը։ Դեսպանը ևս կարեւորեց տարածաշրջանում խաղաղության գործոնը։ Նա նշեց, որ մեր երկրից հեռանում է ջերմ հուշերով՝ մնալով Հայաստանի բարեկամը։
