Մինչ կառավարության նիստի սկզբում Նիկոլ Փաշինյանը հիշեցրեց, որ Ազգային ժողովն ընդունել է կառավարության ծրագիրը։
«Հիմա մենք պետք է կենտրոնանաք կառավարության գործունեության միջոցառումների հնգամյա ծրագիրը կազմելու և հաստատելու վրա: Օրենսդրությունը սրա համար նախատեսում է եռամսյա ժամկետ: Իհարկե, մենք արդեն բավական երկար ժամանակ աշխատում ենք միջոցառումների ծրագրի նախագծի վրա, բայց ես հույս ունեմ, որ արդյունքում կունենանք մի փաստաթուղթ, որը մեր ամենօրյա գործունեության և անելիքների պլանը կդառնա:
Ինչպես արդեն պայմանավորվել ենք, միջոցառումների ծրագիրը պիտի բխի կառավարության ծրագրից, իսկ կառավարության որոշումները՝ միջոցառումների ծրագրից: Բացի, Աստված մի արասցե, արտակարգ դեպքերից, կառավարության որևէ որոշում պետք է բխի կառավարության գործունեության միջոցառումների ծրագրից, վերջինս էլ, իր հերթին, կառավարության ծրագրից»,- ասաց Փաշինյանը:
Փաշինյանը հիշեցրեց, որ կառավարության ծրագրի նախաբանում արձանագրված է, որ ծրագիրը հենված է նաև քարոզարշավի ընթացքում քաղաքացիներին տրված նախընտրական խոստումների, ինչպես նաև բանավոր խոստումների վրա:
