Կառավարությունը 7.6 մլրդ դրամ հատկացրեց 51.1 կմ ավտոճանապարհ հիմնանորոգելու համար

Այսօրվա նիստում կառավարությունը 7.6 մլրդ դրամ հատկացրեց 51.1 կմ ավտոճանապարհ հիմնանորոգելու համար, որից միջպետական նշանակության ավտոճանապարհներ՝ 37.3 կմ, հանրապետական նշանակության ավտոճանապարհներ՝ 13.8 կմ:

«Նախագծի ընդունումը պայմանավորված է 2021 թվականի համար նախատեսված 6 ճանապարհահատվածների հիմնանորոգման աշխատանքների իրականացման անհրաժեշտությամբ»,- ասաց ՀՀ տարածքային կառավարման և ենթակառուցվածքների նախարար Գնել Սանոսյանը:

ՀՀ վարչապետը հիշեցրեց, որ կառավարությունը տարեկան 500 կմ նորոգված ճանապարհի խնդիր է դրել: 

«Երբ 2019 թվականին մենք տարեկան 500 կմ-ի նշաձողը դրել ենք, մենք այդտեղ չենք հաշվառել «Հյուսիս-հարավում» կատարվող աշխատանքները և սուբվենցիաներով կատարվող աշխատանքները, այնպես որ իրական աշխատանքը 500 կմ-ից ավելի է»,- ասաց վարչապետը: