Վիետնամի Սոցիալիստական Հանրապետությունում (ՎՍՀ) Լաոսի Ժողովրդական Ժողովրդավարական Հանրապետության դեսպանությունում այսօր՝ սեպտեմբերի 7-ին, կայացել է համատեղության կարգով Լաոսի Ժողովրդական Ժողովրդավարական Հանրապետությունում ՀՀ արտակարգ և լիազոր դեսպան Վահրամ Կաժոյանի (նստավայրը՝ Հանոյ), հավատարմագրերի հանձնման արարողությունը ՎՍՀ-ում Լաոսի Ժողովրդական Ժողովրդավարական Հանրապետության դեսպան Սենգֆետ Հունգբունգնուանգին:
Լաոսի Ժողովրդական Ժողովրդավարական Հանրապետությունում ՀՀ դեսպան Վահրամ Կաժոյանի հավատարմագրերի հանձնումը նման ձևաչափով պայմանավորված է COVID-19 համավարակի տարածման և Վիետնամ-Լաոս ցամաքային և օդային սահմանների փակ լինելու հանգամանքներով:
Հավատարմագրերի հանձնման պաշտոնական արարողությունից հետո կայացած հանդիպման ժամանակ կողմերը քննարկել են երկու երկրների միջև երկուստեք հետաքրքրություն ներկայացնող ոլորտներում երկկողմ հարաբերությունների, միջազգային կազմակերպություններում համագործակցության հետագա զարգացման ու խորացման հնարավորությունները, COVID-19 համավարակի տարածման և կանխարգելման խնդիրները, երկու երկրների միջև իրավապայմանագրային դաշտի ստեղծումն ու ընդլայնումը և այլ հարցեր:
Դեսպան Հունգբունգնուանգը, ողջունելով իր հայաստանյան գործընկերոջը, նշել է, որ Կաժոյանն առաջին ՀՀ դեսպանն է, որ հավատարմագրվում է Լաոսում և ասել է, որ հավատարմագրի բնօրինակն անմիջապես կուղարկվի Լաոսի նախագահ Տհոնգլուն Սիսուլիթին:
Իր հերթին դեսպան Կաժոյանը հույս է հայտնել, որ մոտակա ժամանակում Լաոսը ևս համատեղության կարգով կհավատարագրի իր դեսպանին Հայաստանում: Հանդիպման ընթացքում քննարկվել է Հայաստանում ուսանած լաոսցիների միություն ստեղծելու հարցը: Ընդ որում, դեսպան Հունգբունգնուանգը նշել է, որ իր կինը նույնպես մեկ տարի ուսանել է Երևանում:
Վահրամ Կաժոյանի հավատարմագրերի հանձնման արարողությանը մասնակցել են ՀՀ դեսպանության երկրորդ քարտուղար Արամազդ Մուրադյանը և Լաոսի դեսպանության երկրորդ քարտուղար Սոմվիլայ Չահտավոնգը:
